إعلان قطري مفاجي بمليارات الدولارات لمصر.. شوف هتيجي امتي

من فترة اتكلمنا هنا في بانكير عن العلاقات المصرية الخليجية وإزاي تقدر تحل كل الأزمات في مصر لو جزء من الاستثمارات في الخليج جت مصر، والحقيقة دول الخليج مقصرتش قبل كده وكانت دايما سباقة في دعم مصر وقت الأزمات ومصر طول عمرها الضهر القوي لاخواتها في الخطر.. إيه حكاية التصريحات القطرية النهاردة وإزاي هتغير واقع سوق الصرف والعملة الصعبة في مصر وإيه قصة المليارات اللي جاية في الطريق

قطر ملتزمة بتنفيذ وعودها باستثمارات بمليارات الدولارات لمصر.. دي كانت تصريحات على الكواري وزير مالية قطر النهاردة في سياق كلامهة عن مصر والعلاقات الاقتصادية بين البلدين.. وعشان تبقوا عارفين قطر سبق وتعهدت في مارس 2022 بتقديم 5 مليار دولار لمصر وكلام الوزير نهاردة بيأكد تنفيذ الاستثمارات دي في أقرب وقت وقاله  في منتدى قطر الاقتصادي.

قطر عشان ماننساش حطت 3 مليار دولار في البنك المركزي المصري السنة اللي فاتت لمساعدتها في معالجة الصعوبات اللي واجهتها، والكواري استبعد تقديم وديعة قطرية تانية لمصر وقال إنه هيكون استثمارات مباشرة ورجع الوزير اقطري وأكد إن قطر منفتحة على ضخ مزيد من الاستثمارات في مصر، وهتركز على قطاعات مهمة وناجحة في مصر وفيها فرص زي التصنيع والاتصالات والسياحة.
حسب خبراء الاقتصاد كلام الوزير القطري النهاردة مهم جدا، لانه بيرجع الثقة في قطاع الاستثمار وبيكذب في الوقت نفسه الكلام اللي اتقال عن توقف الاستثمارات الحليجية في مصر واستغلته جهات معادية عشان تضرب اسفين في علاقة مصر بدول الخليج.

وكمان شايفين إن الاستثمار أفضل من القروض والودائع لأنه بيجيب أرباح وبيوفر فرص عمالة  ويدي تنافسية للاقتصاد المصري وفي نفس الوقت ضخ للدولارات والأهم إن الاستثمار مش ديون هتحتاح لسدادها بالدولار.
وبمناسبة الديون الخارجية مصر كانت اشتغلت من فترة مع الدول اللي ليها ديون عندنا بتحويلها لاستثمارات مقابل مزايا توفرها الدولة المصرية والملف محقق حسب المعلومات نتايج هايلة لغاية دلوقتي وفيه دول وافقت تلغى جزء من الديون وتستثمر الباقي وفيه دول وافقت من حيث المبدأ.