مفاجأة فى أسعار الدهب قبل العيد

 
يا ترى ايه اللى بيحصل فى سوق الدهب؟ وليه الاسعار رجعت ترفع تاني؟ وهل الطلب فعلا زاد تاني؟ وامتى هنحس بقرار اعفاء دهب المصريين بالخارج من الجمارك واى رسوم؟ والأهم اخبار الاسعار ايه الفترة الجاية؟ 

أسعار الدهب بتشهد حالة من التقلبات خلال الأيام الأخيرة، بعد عودة موجة الصعود المتتالي في أسعار المعدن النفيس من يوم الجمعة اللى فات، وقفز سعر الدهب عيار 21 من مستوى 2220 جنيه للجرام الذلي سجله في صباح تعاملات الجمعة ، إلى مستوى 2480 جنيه للجرام فى اخر تعاملات تمت النهاردة وفقًا لشعبة الدهب بالغرف التجارية.. فيا ترى ايه الأسباب؟ وازاى ده بيحصل ومفيش اى متغيرات تمت الكام يوم اللى فاتوا؟ 
هاني ميلاد رئيس شعبة الدهب والمجوهرات بالاتحاد العام للغرف التجارية، جاوب على الأسئلة دي كلها وعلى غيرها من التساؤلات اللى بتشغل بال المواطنين.
ميلاد أكد إن الطلب على شراء الدهب عاود الصعود بشكل ملحوظ من يوم الجمعة ولغاية دلوقتي وده ساهم في عودة ارتفاع أسعار الدهب بعد هبوطها من وقت تفعيل قانون الإعفاء الجمركي لواردات الدهب اللى بتدخل بصحبة القادمين من الخارج.

رئيس الشعبة قال أن قرار مجلس الوزراء بإعفاء وارادت الدهب من الرسوم الجمركية ساهم في خلق هدوء نسبي على الطلب، نظرًا لمخاوف المواطنين من هبوط الأسعار بعد تفعيل القانون، وقال ان القرار دفع كتير من الناس لبيع مدخراتهم من الدهب، الأمر اللي ساهم في زيادة المعروض واستقرار الأسعار.
ميلاد قال ان الطلب رجع يزيد من تانى ومعاه بشكل طبيعي زادت الاسعار واكد ان من الصعب توقع مصير أسعار الدهب خلال الفترة الجاية لأسباب كتير منها متغيرات حصلت فى السوق وكمان اسباب تانية ليه علاقة بسعر صرف الدولار فى السوق الموازية.
طبعا كلام رئيس شعبة الدهب ما تطرقش لموضوع الكميات اللى هتوصل من الخارج واللى هيكون ليه دور كبير فى زيادة المعروض ولحد دلوقتى رغم تفعيل القرار لسه مفيش كميات كبيرة دخلت خصوصا وان اجازات المصريين فى الخارج لسه قدامها كام يوم ومتوقع دخول كميات كبيرة لسوق الدهب الفترة الجاية. 
ولو فضلت زيادة الطلب مستمرة زي ما هي من غير دخول دهب من بره متوقع اسعار الدهب تحقق مفاجأة قوية وتوصل للذروة قبل عيد الأضحى وفيه توقعات انها ممكن توصل لأعلى نقطة مقاومة عند 2800 جنيه للجرام ولو مكنش فيه حلول لأزمة نقص المعروض.