السنين العجاف مرت.. ودروس بمليارات
من كورونا للحرب الروسية لأزمة الدولار وارتفاع الأسعار وهروب الأموال الساخنة.. أزمة ورا أزمة، وضربة ورا ضربة وبردو فضلت مصر قوية وضهرها شديد وقدرت تعبر وتعدي من سنين العجاف بداية من 2020 ولغاية دلوقتي وقدرت البلد تقوم على حيلها وتعافر وتبني وتخطط وتنطلق في كل المجالات.
امبارح قرار المركزي المصري بتثبيت أسعار الفايدة كان تتويج لشغل كتير جدا على مدار شهور فاتت، كانت الدولة فيها بتحارب على 100 جبهة في الداخل والخارج وكلها أزمات كانت تقضم وسط أي دولة، لكن قدرة البلد دي وشعبها اللي في الشدة بيبان ورجالتها في كل حتة وفي كل وزارة وهيئة ورجال البنك المركزي اللي مكانوش بيناموا خلاها تخرج بأقل الخساير.
ممكن الناس تفتكر إن المحنة عدت وخلاص لكن مايعرفوش إن فيه دروس مهمة جدا الدولة المصرية قدرت تستوعبها، وعرفت الطريق عشان متكررش الأخطاء وعرفت أزمة الدولار جاية منين وإزاي ماترجعش.. عرفت الحل في التصنيع والإنتاج والزراعة والتجارة ,... عرفت يعني إيه تفكر بره الصندوق وتخلق حلول من لاشيء .. وعرفت إزاي تجذب المستثمرين وعرفت ازاي ترفع صادراتها وتقوي سياحتها وعرفت إزاي الأزمات بتدار بنجاح.. ودا الدرس اللي مش ممكن مصر تنساه.
