ليه المصريين بيحترموا مدبولي ويصدقوه؟

من غير مبالغة ولا مزايدة الدكتور مصطفي مدبولي أكتر رئيس وزراء مصري بيحظى باحترام الناس وحبهم والراجل ليه مكانة كبيرة عند المصريين والوحيد اللي بينزل بالكاجوال وسط الناس ومن غير حراسة ومش بيخاف والناس بتجري تتصور معاه، ايه الميزة اللي مدبولي مكانتش في رؤساء الحكومة اللي قبله واللي كتير منهم دخل في أزمات مباشرة مع الناس بسبب تصريحاتهم المستفزة أو تصرفاتهم الغريبة أو لسؤء إداراتهم.

المصريين معروف عنهم إنه صعب حد يضحك عليهم او يبيع لهم الوهم خاصة لو كان مسئول، والشعب عارف مين بيشتغل ومين كان بيضحك عليه، والغريبة العالم كله مفهمش عقلية المصريين في النقطة دي بالذات لما القيادة السياسية خدت قرارات صعبة وقالت للناس نستحمل من كام سنة، الناس بره وأصحاب النفوس الضعيفة قالك البلد هتثور والناس مش هتستحمل، لكن الشعب المصري كان عند حسن ظن القيادة عارفين ليه .. لأن الشعب كان شايف الشغل على الأرض والبلد الجديدة اللي بتتبني من أول وجديد والمشروعات في كل زاوية والطرق والكباري وحياة كريمة والبنية التحتية والزراعة والمدن الجديدة والقاهرة الإدارية عشان كده الشعب وقف في ضهر السيسي ولسه هيقف.

الدكتور مصطفي مدبولي من النوع المسئولين المهذب واللي بيشتغل بصمت وعنده رؤية وبينجز ودي كانت 
طريقته لما كان ماسك وزارة الإسكان وعمل فيها شغل ماتعملش من 100 سنة وعشان كده الرئيس السيسي كلفه برئاسة الحكومة.

مدبولي زي ماقلنا مش بتاع مكاتب وقرارات ومسكنات وتصريحات وشو إعلامي.. دا راجل بتاع شغل ولف في الميادين والمشروعات يوم في أسوان والتاني في اسكندرية وبعدها في مطروح وسيناء، وغير كده بيدير أزمة ضخمة في الاقتصاد غير مسئولياته الرهيبة كمان وفي نفس الوقت عمره مايحسسك بالخطر بالعكس دايما تصريحاته رصينة وبتتحقق ومش بيقول أي كلام.
الميزة الأهم في مدبولي إنه متحدث لبق ومرتب وقادر على شرح سياسته والقرارات عشان كده الناس بتفهمه لما يتكلم، وبتحترمه جدا لأنه مش بيضحك عليها، ولسه من كام يوم شافوه في مول بيتمشى زي أي مواطن والناس اتفاعلت معاه وخدت صور ودي شيء نادر يحصل مع رئيس وزراء مصر، لكن لأن الراجل مختلف وواضح الناس حبته.
كمان لو قسنا حجم الإنجازات لحكومة مدبولي سواء قبل الأزمة أو بعدها هنعرف الراجل دا قد ايه شغال وقد ايه هو مرتب لانه رغم كل الصعاب دي صامدة وشغال وبيضحك والأهم عارف بكرة فيه إيه ومخططله وكلامه النهاردة بيقول إنه ماسك كل الملفات بإيديه ومفيش خوف على الحكومة.