دولار السوق السوداء يلامس السعر الرسمي المعلن من البنوك

 

ضربة في مقتل  لتجار العملة الصعبة والدولار في السوق السودا، وهم الذين قاموا ببث سموم واشاعوا وصول الدولار إلي 50 جنيه لكن  نقبهم طلع على شونة مخرومة لما الدولار بدأ ينهار وقرب كمان من سعر البنوك..ولسه السعر بينهار كمان بعد انفراجة الدهب وتبخر أحلام تعويم الجنيه.. ايه اللي هيحصل في السوق السودا الأيام الجاية واللي لموا الدولارات هيعملوا إيه في مصيبتهم؟

ملامح مصيبة تجار السوق السودا للدولار بدأت مع ثبات سعر الدولار وبعدين بداية نزوله بقوة في السوق الموازية نتيجة تحسن موارد الدولة من الدولارات وكمان تبدد فرص تعويم الجنيه والمؤشرات والأرقام اللي بتقول إن الجنيه راجع بقوة وإن الدولار سعره هينزل مع استقرار الأسواق وانخفاض التضخم والاتجاه لعدم رفع سعر الفايدة في اجتماع لجنة السياسات النقدية في البنك المركزي أخر الشهر.
طبعا مجرد ما الدولار ما بينزل في السوق كل اللي لم وخزن العملة الامريكية خسر الجلد والسقط لأنه اشترى بالغالي وخزن العملة على أمل إنها ترفع ويحقق ثروة في غمضة عين لكن أتت الرياح بما يشتهي تجار السوق السودا ودلوقتي بيدوقوا من كاس الخسارة والانهيار.
أكيد مفيش حل قدام تجار العملة غير إنهم يتخلصوا من الدولارات اللي معاهم بمبدأ خسارة قريبة ولامكسب بعيد وبكده يبقى الدولة الرسمية انتصرت تاني في معركة الدولار وقدرت تحافظ على السيولة الدولارية في السوق وكفاية شهادة نجاح للبنك المركزي إن مفيش سلعة اختفت أو قلت من السوق وكمان الاحتياطي النقدي بيزيد يعني مفيش أزمة عميقة زي ماافتكر تجار السوق السودا.
وحسب المعلومات اللي جاية من سوق الضلمة امبارح كانت ليلة عصيبة على تجار الدولار في السوق السوداء بسبب التراجع الكبير خلال التعاملات  بعد تقارير بتأكد عدم خفض الجنيه المصري مرة تانية وتحسن موارد النقد الأجنبي ونمو الاحتياطي النقدي الأجنبي.

وقالت مصادر إن سعر الدولار في السوق السوداء هبط بشكل كبير وسجل 32 جنيه للدولار الواحد وفي بعض المناطق 31.8 جنيه ، بينما استقر سعر الدولار في البنوك عند مستويات الـ 30.85 جنيه للشراء و 30.95 جنيه للبيع يعني السعر قرب جدا من السعر الرسمي في البنوك.