الدهب رايح على فين؟ وتشتري ولا تبيع؟
من بعد اعلان قرار الفيدرالي الأمريكي برفع أسعار الفايدة ٢٥ نقطة أساس وفيه اهتمام كبير بأسعار الدهب الفترة الجاية والكل عاوز يعرف هل اسعار المعدن النفيس هتزيد ولا تقل.. وهل اللي معاه دهب يبيع ولا يستنى شوية.. واللي عاوز يشترى يتوكل على الله ويخلص دلوقتي ولا ممكن حاجة تحصل تخلى الدهب ينزل.؟
وفي التقرير ده هنقول لحضراتكم شوية معلومات عن سوق الدهب وكل واحد يحسب حسبته وياخد القرار اللي يناسبه.
مبدئيا كده الدهب من امبارح بدأ يتحرك بعد قرار الفيدرالي الأمريكي برفع سعر الفايدة وبعد تصريحات لمحافظ البنك جيروم باول المح فيها إلى التوقف عن رفع الفايدة الفترة الجاية.
وقفت سعر الاونصة عالميا فوق الة٢٠٠٠ دولار وكان وصل ل ٢٠٨٠ دولار وتراجع في الساعات الأخيرة لمستويات ٢٠٥٠ دولار وفيه توقعات انه لو عدا نقطة المقاومة ٢٠٨٠ دولار ممكن يوصل ل ٢٥٠٠ دولار خلال أيام.
ولازم نكون عارفين ان فيه اهتمام عالمي كبير بحياة الدهب الفترة الأخيرة وحتى البنوك المركزية نفسها بتشتري الدهب بكميات كبيرة بسبب استمرار التضخم وخوفا من تآكل المدخرات.
ومتوقع الفترة الجاية الاهتمام بشراء الدهب يزيد ما يقلش ولو الفيدرالي أعلن بشكل واضح التوقف عن رفع الفايدة هنشوف اسعار ممكن توصل ل ٣ آلاف دولار للاونصة.
ده على المستوى العالمي.. لكن اللي بيحصل في السوق المحلي مختلف تماما والأسعار عدت السعر العالمي بمراحل قياسا على السعر الرسمي للدولار في البنوك وحاليا سعر الجرام بيتداول في حدود ٢٦٥٠ إلى ٢٦٦٠ جنيه ولو حسبت الاسعار دي على السعر العالمي هتلاقي أن الدولار مقيم بأعلى من ٤٤ جنيه.. يعني الجرام بيتباع بأعلى من سعره العادل بأكثر من ٧٠٠ جنيه.
طيب تبيع ولا تشتري؟
طبعا كل واحد لازم يحسب حسبته ويشوف حجم المخاطرة الأول لكن الأفضل لو هتشترى تقسم فلوسك وتشتري بجزء وتشيل جزء تاني ولو هتبيع ممكن تبيع قيمة مكسبك من الدهب الفترة اللي فاتت وتحتفظ بأصل المبلغ اللي كنت مشتري بيه عشان تقلل المخاطرة.
وعموما الدهب على المدى البعيد استثمار أمن وبيحقق مكسب مضمون.
