مصر عملت صندوق استثمار في الذهب.. أعرف ازاي تستفاد منه؟ وأية فايدته

اتكلمنا قبل كدا عن صناديق الاستثمار وقولنا أنها  وسيلة استثمار قائمة على المشاركة مع مستثمرين تانيين.. يعني رؤوس أموال مجموعة من المستثمرين بتتحط في صندوق بهدف استثمارها وبيتم إدارتها وفقاً لإستراتيجية وأهداف استثمارية.

والبنوك بتستثمر الفلوس دي في اكتر من وعاء إدخاري علشان تجيب أكبر نسبة عائد.

واللي تقدر تفهمه من كلامنا هو أن صندوق الاستثمار مش خاص بيك أنت لوحدك.. لأ.. أنت هاتحط فلوسك في الصندوق مع مستثمرين تانيين.

الجديد بقى إن مصر وافقت على تدشين صندوق الاستثمار في الذهب.. ودا بالتزامن مع القفزات المتتالية اللي بتحصل في أسعار الذهب في مصر، واللي زاد بنسبة 58% من بداية 2023.

والقرار دا كان في منتهى الأهمية.. هاتقولي لية؟

هاقولك لأن التوجه الشعبي دلوقتي للناس هو الاستثمار في الذهب فالدولة شافت إن ضروري يكون في صناديق استثمار يحط فيها المستثمر فلوسه ويحقق عائد زي باقي صناديق الاستثمار العادية بس بعوائد أكبر.

هاتقولي يعني أنا أقدر احط فلوسي في صناديق الاستثمار دي وأبدأ استثمر في الذهب.

هانقولك ايوووه.. دا ممكن يحصل وتقدر تبيع أو تشتري حصص ليك في الصندوق حسب رغبتك .. ودا حايخليك محمي تماماً من التعرض للغش أو أن الذهب يتسرق زي ما بيحصل في حالات البيع والشراء العادية.

طيب ازاي الصندوق دا هايشتغل.

بص يا فندم.. حضرتك بتشتري وثيقة هايتم طرحها قريب 
وهاتحدد من خلالها كمية الجرامات من الذهب اللي عايز تمتلكها.. وبعد فترة تقدر تبيع أو تشتري تاني وتحط في الصندوق.. وفي الوقت المناسب تقدر تبيع وفي الوقت المناسب تقدر تشتري وتحط في الصندوق وهكذا.

وغالبا قيمة الحد الأدنى للاستثمار في الصندوق اللي هايكون من خلال الوثيقة هو أنك تشتري جراامات ذهب  يصل من 25 إلى 50 جرام.

ودا يعتبر أفضل بكتير من الاستثمار في الذهب من خلال الطريقة التقليدية ودا.. لأنك هاتاخد نسبة فايدة على الوثيقة عند امتلاك الذهب بنفسه، ودا بعكس الشراء التقليدي اللي بيعتمد على متغير واحد للربح وهو ارتفاع السعر، ودا أمر غير مضمون.

يعني ببساطة أنت دلوقتي مش محتاج تدخر مبلغ ضخم علشان تشتري سبيكة دهب، لأ أنت هاتشتري جرامات محدودة وهاتبدأ في البيع والشراء.. ودا من شأنه أنه يمنع المضاربات اللي بتحصل في الذهب واللي بتخلي سعره عالي.