انقاذ الجنيه؟

ازاى الحكومة بتفكر فى انقاذ الجنيه المصري من التراجع؟ وايه الحلول من خارج الصندوق اللى ممكن توقف نزيف العملة الوطنية؟ وهل هنشوف الأيام الجاية أفكار جديدة توفر مليارات الدولارات لخزينة الدولة؟ 

نقص في العملات الأجنبية
 

مصر بتعانى فى الفترة الخيرة من نقص واضح فى العملة الأجنبية بسبب تداعيات الحرب الروسية الاوكرانية اللى تسببت فى ارتفاع غير طبيعى فى اسعار النفط والحبوب وكل السلع الغذائية .. وده عمل فجوة تمويلية كبيرة جدا فى الموازنة العامة وبقا فيه صعوبة كبيرة فى توفير الدولار اللازم لاستيراد السلع والحكومة مع البنك المركزي الحقيقة بيبذلوا جهود عظيمة لسد الاحتياجات خصوصا فى السلع الاستراتيجية اللى بيعتمد عليها ملايين المصريين فى حياتهم اليومية .. لكن الطلب فوق تحمل أى دولة وده خلا الدولار سعره يطير فى السما والجنيه المصري يتراجع والحقيقة ان مش الجنيه بس اللى تراجع قدام الجنيه ولكن أغلب العملات العالمية بتشهد تراجع غير مسبوق قدام العملة الأمريكية. 

مصادر مصر من الدولار

طبعا مصادر مصر من الدولار معروفة وثابتة اذا كان تحويلات المصريين فى الخارج او ايرادات قناة السويس او حتى السياحة واخيرا الصادرات .. والمصادر الأربعة فيهم 3 مصادر أرقامهم بتزيد وشفنا ازاى تحويلات المصريين قفزت ومعاها عائدات قناة السويس وكمان الصادرات يمكن بس السياحة هى اللى بعافية شوية وده لأن اغلب السياح اللى كانوا بييجوا مصر كان اغلبهم من روسيا واوكرانيا والاتنين بسبب الحرب ما بقاش ييجى منهم سياح للسوق المصري. 
 

حلول خارج الصندوق 

وعشان كده الحكومة بدأت مؤخرا تفكر فى حلول خارج الصندوق ومصادر غير تقليدية لتوفير الدولار بعيدا عن المصادر الأربعة التقليدية وبدأنا نسمع أخبار عن مبادرات وقوانين مهمة وجريئة هتساهم فى انقاذ الجنيه وهتوفر للدولة مليارات الدولارات اللى هتضخ فى الاحتياطي النقدي الأجنبي ومن الأفكار دي فكرة السماح للمصريين المقيمين فى الخارج بشراء سيارة وادخالها الى مصر بدون جمارك ولا ضرايب ولا اى مصاريف ادارية مقابل وديعة بالدولار هتتحط فى حساب وزارة المالية لمدة 5 سنين بدون فوايد والمباردة دي الكل فيها كسبان الحكومة اللى هتاخد وديعة بدون فوايد لمدة 5 سنين تقدر تشغلها وتستفيد منها من غير اى تكلفة .. والمقيم فى الخارج اللى هيجيب عربية سعرها مريح ومش هيدفع عليها اى رسوم وفلوسه هترجعلوا بعد 5 سنين وحتى لو حصل ارتفاع فى سعر الدولار فلوسه هتزيد وهيكسب كمان.

افكار غير تقليدية 

ومن الافكار غير التقليدية اللى بتنفذها الحكومة مع البنك المركزي بتوجيهات من الرئيس السيسي دعم الصادرات المصرية واستهداف تحقيق 100 مليار دولار صادرات للخارج سنويا والرقم ده طبعا لو اتحقق هيعمل وفرة كبيرة جدا فى المعروض من الدولار هتخلى سعر الدولار مستقبلا يتراجع بشكل كبير وهتعزز من قيمة ومكانة الجنيه المصري. 
وفيه كمان قرارات البنك المركزي المصري الأخيرة اللى حجمت حدود السحب من بطاقات الائتمان خارج البلاد ودي كانت قرارات مهمة جدا لأن فيه مستوردين نفوسهم مريضة كانوا بيستغلوا الأزمة ويسافروا بره ويسحبوا دولارات من حساباتهم ويرجعوا يبيعوها فى السوق السودة 
ومن الافكار اللى كانت فى الجول فكرة استخدام الية مشتقات الجنيه واللى هتخلى المستثمر الأجنبي يضخ فلوسه فى السوق المصرى وهو مطمن ومش خايف من تقلبات سعر الصرف.
كمان الية سحب السيولة من البنوك واحدة من الادوات غير التقليدية لضبط السوق ومحاولة ادارة السيولة بطريقة رشيدة والبنك المركزي سحب ما يقرب من ١٠ مليار عن طريق عطاءات قدمتها البنوك. 

أفكار 
 

ومن اهم الافكار اللى ظهرت فى الفترة الأخيرة وهيكون ليه مردود مهم على قيمة الجنيه قرارات تقليل الاستيراد واقتصاره على السلع الأساسية مع البدء فورا في توطين أكبر عدد من الصناعات المحلية واللى هتشغل ناس كتيرة وهتساهم فى زيادة النمو والناتج المحلى.