الذهب طار بفعل فاعل.. حكاية العصابات اللي ظهرت في الصاغة

إيه اللي بيحصل في سوق الدهب ولحد إمتي الأسعار هتزيد والفوضي اللي في السوق هتستمر لغاية امتي وليه الناس بتشتري في الغلا والأسعار العالية جدا وإيه هي مرحلة الخطر اللي الناس ممكن يتخرب بيتها فيها..
 

اسعار الذهب ترتفع بقوة

طبعا كلنا متابعين اللي بيحصل في سوق الدهب، أسعار فلكية وزيادات بالجملة وكل ساعة في سعر والناس بردوا بتشتري وزحام على محلات الدهب وكأن بكرة البلد هتموت من الجوع ودي عادة المصريين واللي أغلب الناس بتتصرف بعقلية القطيع يعني زي ما بيعمل جاري أو زميلي في العمل بقدلده فورا وهكذا لغاية ما تشكل رغبة جماعية أو سلوك موحد حتى لو كان ماشي في الاتجاه الغلط.

فوضي في سوق الذهب

مهما كانت الفوضى في سوق الدهب دلوقتي لكن فيه حدود للعقل والتجارة والاسعار والمنطق، واللي كله بيقول إنه مش ممكن يستمر بالشكل دا، وإن فيه انتكاسة للأسعار قربت أوووي والناس اللي بتشتري كميات من الدهب هتخسر كتير لأن السوق غدار وملهوش أمان وفي أي لحظة ممكن تنزل او تنهار الأسعار.
طبعا الناس بتجري على الدهب عشان خايفة من التعويم وخايفة من ارتفاع الدولار وانخفاض قيمة الجنيه عشان كده بتشتري دهب وتخزنه يعني بتحول الفلوس لدهب عشان قيمتها ما تقلقش وده حق مشروع لكن في حدود العقل مهو لو أنا اشتريت بفلوسي أو مدخراتي دهب بسعر غالي وبعدين انهارت الأسعار هخسر بردو من قيمة فلوسي وامكن تكون خسارة أكبر لو حصل تعويم.

تحذير من شعبة الذهب 

شعبة الدهب نفسها حذرت من اغراء السوق وحذرت المستهلكين وطالبت بالتفكير والانتظار في حركة الشراء لحين استقرار الأسعار بالأسواق وتناسبها مع السعر العالمي ومتغيرات السوق المحلية، وعدم اعتبار الزيادة الحالية مؤشر لزيادة مستقبلية في الأسعار قد تدفع البعض لزيادة مشترياتهم من الذهب.

وقالت الشعبة العامة للذهب والمجوهرات بالاتحاد العام للغرف التجارية برئاسة المهندس هاني ميلاد جيد إنها رصدت زيادات غير مبررة في الأسعار بالأسواق المحلية، وإن سعر جرام عيار 21 وصل الي 2320 جنيها خلال تعاملات مساء الاثنين بزيادة حوالي 60 جنيه للجرام عن أسعار إغلاق الصاغة السبت الماضي بالرغم من تراجع السعر العالمي الي 1996 دولار للأوقية بعدا ما كانت 2004 دولار.

مبالغة في الأسعار

حسب كلام كتير بيتقال في الصاغة هنلاقي إن المبالغة في الأسعار وراه قوى ضغط في سوق بتستغل الحالة وتشتري عشان تضارب في الأسعار وإن الموضوع تخطى الشراء والبيع  وظهرت زي عصابات أو مجموعات من ناس بتفهم في الدهب وبقت تلم وتبيع وتضارب وتكسب من الهواء ودول اللي مولعين السوق.