إسمه كان على العملات المصرية ل ١٠ سنين.. مين هو فاروق العقدة أشهر رئيس بنك مركزي في مصر

مين فينا ماشفش اسم محافظ البنك المركزي فاروق العقدة على العملات المصرية.. واللي بيعتبر من أشهر الرؤساء اللي تولوا منصب محافظ البنك المركزي لمدة ١٠ سنين.

والدكتور فاروق العقدة.. هو من أبناء محافظة الدقهلية.. مواليد سنة  1943 .. وتخرج من كلية التجارة جامعة عين شمس عام 1965 وشارك بعد تخرجه في حرب أكتوبر المجيدة عام 1973 وكمان عمل معيدا في الجامعة وكمل رحلته في اكتساب العلم لحد لما حصل علي الماجستير من جامعة بنسلفانيا عام 1980 وبعدين حصل علي الدكتوراة عام 1983 من نفس الجامعة.

والدكتور فاروق عبد الباقي العقدة..  عيّنه الرئيس السابق محمد حسني مبارك محافظاً للبنك المركزي المصري في ديسمبر 2003 خلفاً للدكتور محمود أبو العيون.

والمحافظ السابق للبنك المركزي فاروق العقدة بيعتبر من أهم وأبرز الرؤساء اللي تولوا المنصب دا.. لأنه وضع الأسس اللي ارتكزت عليها خطط الإصلاح المصرفى الأولى خلال الفترة 2004-2008، والثانية خلال الفترة 2009-2011.

وكان ليه كمان دور مهم في إدخال كوادر شابة، واستقطاب الكوادر المصرفية المخضرمة، واللي كان على رأسها طارق عامر وهشام رامز وهشام عز العرب، اللي  كانوا في الوقت دا بيعملوا خارج البلاد لفترات طويلة في مصارف عالمية فى أوروبا وأمريكا.

والدكتور فاروق العقدة كان كمان له الدور الأساسي في إدخال تخصصات جديدة زي إدارة المخاطر وصناديق الاستثمار.

وأهم حاجة نفذها المحافظ فاروق العقدة.. هو نجاحه  فى تحسين سوق الصرف، اللي استلمها في الوقت دا وكانت مهلهلة، دا غير نجاحه في زيادة حجم الاحتياطات الدولية من 14 مليار دولار أمريكى فى ديسمبر 2003، ليصل إلى 36 مليار دولار فى ديسمبر 2010.