تفاصيل زيارة وفد صندوق النقد الدولي لمصر

يا ترى وفد صندوق النقد اللي هيزور مصرعشان يراجع برنامج الاصلاح الاقتصادي هييجي امتى؟ وهل الحكومة رفعت اسعار البنزين والسولار عشان الزيارة دي؟ وايه علاقة ده بالكلام عن انخفاض جديد فى سعر الجنيه؟ وهل بعد الزيارة هيبعتوا باقي شرايح قرض ال 3 مليار ولا ايه اللى هيحصل بالظبط؟ 
 
من وقت الاعلان عن موافقة صندوق النقد الدولى على منح مصر قرض جديد بقيمة 3 مليار دولار اتقال انه هيكون فيه مراجعة دورية لبرنامج الاصلاح الاقتصادي اللى بتنفذه مصر كل فترة واتقال ان اول مراجعة هتحصل من قبل الصندوق هتكون فى شهر مارس اللى بدأ من أيام .. فياترى امتى هيوصل وفد الصندوق وايه الحاجات اللى هيراجعها؟ وهل الحكومة مستعدة حاليا للزيارة دي ولا لسه فيه شروط ما تمش تنفيذها؟ 
وفد صندوق النقد بنسبة كبيرة هيوصل فى النص التانى من مارس وفيه تنسيق بيحصل بين وزارة المالية ومسئولى الصندوق لتجهيز كل الملفات المطلوبة للاطلاع عليها من قبل أعضاء الوفد
طب ايه الحاجات اللى هيراجعها صندوق النقد؟ 
الصندوق كان ليه مجموعة من الطلبات او تقدر تقول الشروط اللى طلب تنفيذها عشان يوافق على برنامج تمويل جديد لمصر قيمته 3 مليار دولار والشروط دي كان من بينها حاجات مصر التزمت بتنفيذها زي اعتماد سعر صرف أكثر مرونة للجنيه المصري أمام العملات الأجنبية وعدم تدخل الحكومة لدعم العملة المحلية وترك سعرها يتحدد وفقا لقوانين العرض والطلب وكمان الغاء كل مبادرات التمويل ذات لاعائد المنخفض اللى كان بيدعمها البنك المركزي وتخارج الحكومة من عدة شركات وتحرير أسعار الوقود لكن المسئولين فى مصر اقنعوا الصندوق ان التحرير مش هينفع بشكل كامل لكن هيكون فيه تحريك وده اللى حصل مؤخرا 
وايه اللى هيحصل بعد المراجعة؟ 
بص زيارة وفد صندوق النقد لمصر مهمة جدا وهتكون سبب فى تغيير كبير هيحصل لأن لو الامور تمام الصندوق هيبعت لمصر الشريحة التانية من القرض واللى هتكون اكتر من 300 مليون دولار والفكرة كمان ان اعلان الصندوق رضاه عن البرنامج والخطوات اللى بتاخدها الحكومة ده هيكون شهادة ضمان هتقدر مصر من خلالها تاخد حزم تمويلية من مؤسسات تمويل تانى وزي ما اتقال الحزم دي ممكن توصل ل 14 مليار دولار 
طب ايه علاقة الزيارة المرتقبة دي بالكلام عن خفض جديد في قيمة الجنيه؟ 
مفيش علاقة مباشرة بين الزيارة والخفض المحتمل لقيمة الجنيه لأن زي ما قولنا قيمة الجنيه بيحددها قوانين العرض والطلب وكل ما كان الدولار متوفر كل ما قيمة الجنيه هتزيد والعكس صحيح لكن طبعا خطوة زي دي لو حصلت هيكون ليها أهمية كبيرة فى تقرير الصندوق عن الأوضاع فى مصر.. بس القرار مش هيتاخد عشان الزيارة لأن فيه معايير كتيرة تانية لانخفاض أو استقرار أو حتى ارتفاع قيمة العملة