الارتفاع بفعل فاعل.. لماذا أسعار الذهب في مصر تزيد بجنون؟

 
فيه حاجة غريبة بتحصل فى سوق الدهب بقالها كام يوم.. والتجار وبتوع الصاغة رجعوا تاني يعملوا مضاربات على سعر الدولار.. وفى الوقت اللى سعر الدولار الرسمي فى البنك المركزي والبنوك المرية ما تعداش ال 31 جنيه بتوع الدهب بيسعروا الدولار على 35 جنيه فيا ترى ايه اللى بيحصل فى سوق الصاغة؟ وهل الحكومة هتسيب الوضع يستمر وترجع تانى السوق السودا للدولار؟ ولا هتتدخل باجراءات وعقوبات رادعة ضد مافيا الدهب فى مصر؟ وإزاى اصلا السعر العالمي للدهب بيقل وفى مصر الاسعار بترفع بشكل جنوني؟
 

تلاعب في أسعار الذهب

فيه تلاعب وحاجات مش طبيعية بتحصل فى سوق الدهب فى مصر فى الكام يوم اللى فاتوا وفجأة بعد ما كانت الأسعار مستقرة بدأت تحصل قفزات مش طبيعية لدرجة ان في يوم واحد سعر جرام الدهب عيار 21 زاد أكتر من 70 جنيه مرة واحدة رغم ان مفيش حاجة حصلت تخلى الاسعار تزيد بالشكل ده مرة واحدة والنهاردة وصل سعر الجرام لحوالى 1826 جنيه للعيار 21 الأكتر انتشارا فى مصر .

تسعير الدولار في سوق الذهب

ولو جبت آلة حاسبة وحاولت تعرف تجار الصاغة مسعرين الدولار على كام وحسبت فرق السعر المحلي مع السعر العالمي هتلاقي ان تجار الدهب مسعرين الدولار على حوالى 35 جنيه رغم ان السعر الرسمي فى البنوك لسه ما وصلش ل 31 جنيه 
اللى بيحصل فى سوق الدهب بيقول ان السوق الموازي للدولار بدأ يرجع وان فيه ناس جشعة كل اللى يهمها تحقيق الثروات على حساب البلد وعلى حساب العملة الوطنية لأن مفيش اى مبرر انك ترفع سعر الدولار بالشكل ده فى ظل ان أزمة نقص العملة بدأت تتراجع فى الفترة الأخيرة والبنوك بقت بتوفر الدولار لأى حد محتاجه .

التحوط

لكن فيه وجهة نظر تانية بتقول ان تجار الدهب بيتحوطوا فى تحديد سعر المعدن النفيس وان مؤسسات التمويل الدولية بتتوقع انخفاض جديد فى سعر الجنيه المصري وان الدولار قبل نهاية الشهر ده هيوصل ل 36 جنيه وان فيه تخفيض كبير فى قيمة العملة المحلية مش هيقل عن 10%.