استعدوا.. الذهب سيصل إلى 2000 جنيه قريباً
هو الدهب ممكن فعلا سعره يوصل 2000 جنيه للجرام؟ وليه المعدن الأصفر سعره ارتفع حوالى 500 جنيه فى أقل من شهر؟ وهل الموضوع ليه علاقة بأزمة الدولار فعلا ولا التجار ومافيا الصاغة هما اللى بيتحكموا فى الموضوع على مزاجهم؟
الذهب يرتفع بقوة
من حوالي شهر تقريبا لو حضرتك معاك فلوس وقررت تنزل تشترى بيها دهب كنت هتشترى الجرام 21 بحوالى 1100 جنيه النهاردة الجرام سعره 1600 يعنى رفع 500 جنيه فى أققل من شهر وده رقم وارتفاع محصلش قبل كده في تاريخ الدهب فى مصر.. وفيه ناس شايفة ان اللى بيحصل فى اسعار الدهب مش طبيعي وبيقولوا ان التجار بيتلاعبوا فى سعر المعدن الأصفر وبيسعروا الدولار بأعلى من سعره بحوالى 30% وده اللى مخلى الاسعار طايرة فى السما.. وفيه ناس تانية شايفة اللى بيحصل طبيعى وانعكاس لأزمة الدولار اللى بتعاني منها مصر فى الشهور الأخيرة
بس يا ترى إيه الحقيقة؟
سعر الدهب فى مصر بيتحدد بناء على أكتر من حاجة أولهم طبعا العرض والطلب وفى اوقات الأزمات الكبيرة زي اللى بيعيشها العالم مؤخرا بسبب الحرب الروسية الاوكرانية الناس بتجري على الدهب وتشيل فلوسها فيه وعشان كده فيه اقبال تاريخي على محلات الصاغة وطول ما الاقبال بيزيد السعر بيزيد .
السعر العالمي للدهب واحد كمان من الحاجات الاساسية اللى بتحدد سعر الدهب فى مصر كام وزمان كان السعر العالمي ده هعو المؤشر الوحيد لسعر الدهب لما كان سوق الصرف مستقر وكانت لما تحصل زيادة عالمية تسمع هنا لكن طول ما الدهب سعره مستقر كانت الاسعار متوسطها معروف وبتفرق بس بين محل صاغة والتانى فى سعر المصنعية .. بس خلاص مع القلق اللى بيحصل فى العالم وصعود سعر الدولار لمستويات قياسية السعر العالمي ما بقاش هو المقياس وده هتلاحظه لو حاولت تحسب السعر العالمى والسعر المحلى وهتلاقي الفرق بين الاتنين اكتر من 300 جنيه
طب ده ليه بيحصل ؟
هاقولك .. لأن محلات الصاغة وتجار الدهب شايفين ان سعر الدولار الرسمي فى البنك المركزي والبنوك المصرية مش هو السعر العادل للجنيه وان الجنيه مقيم بأعلى من سعره بكتير عشان كده الدولار لو حسبته على سعر الدهب النهاردة هتلاقي انهم مسعرينه على حوالى 30 جنيه مش 24 و60 قرش زي البنوك
السؤال بقا المهم .. هو فعلا سعر الجرام ممكن يوصل 2000 جنيه؟
للاسف لو الأمور مشيت زي ما هي ماشية كده فعلا سعر الجرام ممكن يوصل ل 2000 جنيه وممكن يتخطاها كمان بس ده مرهون ان الاوضاع ما تتحسنش وازمة الدولار تفضل مستمرة لكن لو حصل استقرار فى سعر الصرف اسعار الدهب هتبدأ تستقر وبعد شوية هترجع تنخفض تاني
