يعني ايه احتياطي نقدي؟ .. و اية فايدته ؟
أسئلة كتير من النوعية دي بيسألها عدد كبير من المواطنين كل لما يقابلهم المصطلح دا، واحنا النهاردة هانشرح بالتفصيل معناه وبيفيد الدول في اية.
الاحتياطي النقدي معناه بكل بساطة أن يكون لدى الدولة مخزون من العملة، سواء دولار أو إسترليني أو يورو.. وبتكون الفلوس دي محفوظة في البنك المركزي للدولة.
طبعا هاتسأل وتقول هو الاحتياطي النقدي بيجي منين وازاى بتستفاد منه الدول؟ بص هو الاحتياطي النقدي بيتكون لما كل اللي بيخرج كمثال من مصر وكل اللي بيخش مصر من عملة .. الفرق بينهم يطلع.. ولو كان الفرق بينهم زيادة في العملة مش نقص فدا بيكون عندي «حصالة» فلوس واللي بتتسمى «احتياطي نقدي».
حلو اوى.. طبعا هاتسأل تاني وتقول.. طيب واية اللي بنستفيده من دا.. الدول بتحطه كدا على جنب وماتستفادش منه بحاجة.. لأ طبعا في إفادة.. وهي أن الدول بتستثمر في الفلوس الاحتياطية دي في مشاريع سريعة الربحية.. يعني ماينفعش تستثمره في العقارات مثلا علشان الأرباح بتتأخر.
امال ايه اللي بيحصل؟
الفلوس دي الدول بتشغلها برة في بنوك أوربا مثلا لو كان العائد عليها كبير وممكن تشتري بيها كمان أسهم وسندات وتستفيد من نسبة الفايدة اللي بتقدمها المصارف العالمية.
بس كدا هي دي كل المميزات.. لأ طبعا لسه في مميزات تانية مهمة، وهو أن الاحتياطي دا بيحافظ على أموال المودعين.. يعني لو لا قدر الله بنك من البنوك تعرض لأزمة أو سرقة مثلا.. فالبنك المركزي للدولة بيروح بسرعة مقدم فلوس من الاحتياطي النقدي علشان فلوس المودعين ماتروحش.
ولازم نكون عارفين أن الاحتياطي النقدي دا بيكون له دور مهم جدا في الاقتصاد القومي، وأي دولة بتحدد عليه قرارات وسياسات اقتصادية مهمة، لأنه بمثابة معيار لقوة أو ضعف الدولة اقتصاديا سواء على الصعيد الدولي أو الإقليمي.
يعني لو كان حجم الاحتياطي النقدي لأي دولة عالي فبتكون الدولة قادرة علي انها تدبر اتفاقيات للاقتراض من المؤسسات الدولية والإقليمية طالما هي عندها احتياطي نقدي قوي، وكمان بيمثل ضمانة للدولة أمام الجهات والمؤسسات دي.. مصدر ثقة يعني.. عرفت بقى يعني اية احتياطي نقدي.
