من الآخر.. لو عايز تشتغل في بنك "بنكير" هيقولك تعمل إيه!
يحلم الكثيرين بإيجاد وظيفة مريحة ومستقرة تؤمن له مستقبله ومستقبل أولاده ويعد القطاع المصرفي من أول القطاعات استقرارًا ومجدية ماديًا ولعل كل شاب حديث التخرج وتسمح له دراسته بالعمل في أحد البنوك يحاول أن يبحث مرارًا وتكرارًا عن هذه الفرصة الثمينة.
وبالبلدي .. "بنكير" بيقدملك فرصة عظيمة ونصائح ثمينة من المؤكد أنها سوف تفيدك في حالة بحثك عن وظيفة داخل أي من البنوك المنتشرة.
"بنكير" بينصحك بقراءة هذه الرسائل جيدًا لعل وعسى تفيدك في العثور على الوظيفة التي تحلم بها وتناسب طموحاتك وما تنوي تحقيقه في المستقبل.
1- حط في اعتقادك ويقينك وقلبك وعقلك أن الشغل ده رزق بتاع ربنا لو عملت إيه وملكش نصيب تشتغل مش هتشتغل حتى لو معاك واسطة .. موضوع الواسطة انساه خالص .. بس هو موجود بس متخليش حياتك والكونسبت اللي عندك انك هتشتغل بواسطة .. الشغل رزق.
2- الواسطة مش هي الأساس .. سوق العمل كبير وخصوصًا البنوك ولو الواسطة هتشغلك وأنت مش كفء فهي مش هتخليك تستمر في الشغل بعد كده .. وناس كتير اشتغلت بدون وسايط.
3- حاول تعمل لنفسك كارير واتجاه معين .. يعني مثلًا حدد لنفسك اتجاه تمشي فيه: محاسب تكاليف مثلا أو محاسب مالي في شركة معينة أو محاسب في بنك أو محاسب مقاولات .. كل هدف دول ليه سكة معينة تمشي فيها علشان توصل .. يعني مثلا لو عايز تبقى محاسب قانوني ركز على المحاسبة والتدريب في المكاتب وشوف محاسب يسجلك وربنا هيكرمك .. أهم حاجة تركز في كارير معين بس تكون على علم بإمكانياتك مش تبقى جايب مقبول مثلا وعايز تشتغل في بنك لأن شروط البنوك بتمنع ده وحدد في حدود امكانياتك.
4- خليك مثقف من الناحية الاقتصادية .. اقرأ في كل حتة ومن على الإنترنت والمقالات الاقتصادية والمعلومات العامة وثقف نفسك علشان تعمل لنفسك شخصية وتوجه وفكر .. وأول الثقافة دي أنك تكون عارف أساسيات كل حاجة زي المحاسبة والإدارة والاقتصاد والتكاليف وقواعد التمويل والبورصة والهيئات الاقتصادية والمالية في مصر وعالميا.
5- الإنجليزي هو الأساس في أي حاجة مش الكمبيوتر يعني انت اتعلم انجليزي صح .. روح مكان رخيص ادرس فيه الإنجليزي واتأسس فيه حلو .. وحسن مستواك وبعدين ادرس في مكان غالي زي المعهد البريطاني عشان الشهادة .. احنا بلد بتاعت سرتفيكشن .
6- الكمبيوتر .. كفاية عليك الأساسيات يعني لو معاك أي سي دي ال حلو قوي .. لان كده كده البنوك كلها عندها سيستم معين لازم تدرب عليه بعد كده المهم يكون عندك الأساسيات تعرف تفتح الكمبيوتر وتقفله وتعرف تشتغل على الأوفيس .. ورد واكسيل.
7- معظم البنوك حاليًا التقديم من خلال الإنترنت يعني على موقع البنك الرسمي غير كده أي إعلانات في أي حتة بتكون كدب واشتغلات وهتفضل تدوس على اللينكات توصلك للينكات تانية لحد ما يبقي عندك 50 سنة .. أي إعلان تشوفه ادخل على الموقع الرسمي بتاع البنك.
8- بمعني انك تتابع الوظايف من خلال المواقع الرسمية بتاعت البنك ولو ليك معارف شغالين في بنوك تابع معاهم لما بينزل إعلانات هما بيعرفوا.
9- لو تقديرك مقبول ما تفكرش انك هتشتغل وريح دماغك حتى لو عملت دبلومة وماجستير ودكتوراه أهم حاجة تقدير الكلية لأنك بتتعين بالكالوريوس مش بالدبلومة.
10- التقديم مثلا في موقع البنك الأهلي وبنك مصر وبتاخد رقم مسلسل زي "أي دي" .. المفروض أن السيستم بيشوف رقم موبايلك وبيبعت لك تلقائي على طول بمعاد الامتحان .. عمليه الاختيار للامتحان دلوقت بقت الكتروني عشان محدش يتدخل فيها أنت قدم وهيبعتولك امتى بقي محدش يعرف.
11- الاتش ار مش قاعد لك أنت بس ده عنده موال كبير تعيينات وامتحانات وانترفيوهات واستيفاءات .. يعني مش شرط يبعت لك في ساعتها علي طول.
12- بالنسبة للامتحان .. أي امتحان بنك في أي حتة أو في أي بنك طالما امتحان بورق وقلم هيكون في الأساسيات اللي ذكرناها .. أسس المحاسبة والاقتصاد والإدارة والتسويق والرياضة.
13- بالنسبة لجزء الإنجليزي لازم تكون فاهم إنجليزي ومدرب كويس على الحل مش امتحان ثانوية عامة بيسألك في اللغة الانجليزية كلغة بس .. لا ممكن يسألك في ثقافتك يعني مثلا ممكن يجي يقولك ما هي أهم رواية لشكسبير ويسألك عن زمن الجملة .. يعني توظيف اللغة في موضوعات.
