لو عندك حساب في البنك.. أهم 7 نصائح لمنع سرقة أموالك والحفاظ على كارت الفيزا
انتشرت في الآونة الأخيرة عمليات الاحتيال المصرفية حيث يقوم أحد الأشخاص بالاتصال بالعميل وإيهامه بأنه من طرف البنك وعليه إخباره بمعلوماته المصرفية وللأسف يقع الكثير من المواطنين فريسة لهؤلاء المحتالين.
وفي ذات السياق تصدر البنوك مرارا وتكرارا الكثير من البيانات التي تحتوي على تحذيرات للعملاء بعدم الإفصاح عن أي معلومات سرية عن معاملاتهم المالية أو حساباتهم المصرفية.
ونرصد فـي٧ نقاط كيفية المحافظة على كارت الفيزا من السرقات الـDigital المنتشرة:
1- لو بتشتري من سوبر ماركت أو بتدفع حساب مطعم أو أي دفع فيزا، الكارت ميبعدش عن عينك ابدا، ولا تحطة فالتشيك ولا تسلمه للكاشير وياخدو يتمشى بيه، ولا تسمحله ينزله تحت الكاونتر، ممكن يكون حاطط موبايل تحت بيصور فيديو ويصوره وش وضهر في أقل من ثانية، خلاص كدة يقدر يشتري بيه اي حاجة تتخيلها .. متخيل؟
٢ ـ الـ CVV .. الكود السري اللي في خلف الكارت، ده أساس كل المشاكل، لو تقدر تحفظه صم أو تكتبه في ورقة تشيلها في مكان امين، وبعديها تمسحه من عالكارت أساسا سواء بالخدش أو بالشطب اعمل كدة!
٣ ـ لما تشتري حاجة Online من خلال المتصفح او الـ Browser لازم وأساسي يكون في علامة قفل على شمال اسم الموقع واضحة وصريحة وده بيكون بروتوكول اتفاق بين المتصفح وبين الجهة المسجلة الحقيقية والمعتمدة أو تستخدم البرنامج الاصلي لجهات موثوقة زي أنا فودافون واوبر وكريم والحاجات دي غير كدة ابعد.
٤ ـ لما تشتري Online اتعامل مع المواقع الموثوق فيها وبس، وابعد تماما عن أي مواقع مشبوهة او مواقع الـPorn والقرف ده، المواقع المشبوهة ممكن تقدملك خدمة رخيصة، بس في المقابل بيسجلوا بيانات الكارت ويستغلوها بذكاء شديد بعدين ممكن بعد شهور أو سنة، تلاقي نازلك عملية دفع بآلافات للـ Facebook Ads مثلاً مع انك معملتش أي حاجة.
أغلب عمليات السرقة بتكون بشكل غير مباشر، علشان النصاب ميفضحش نفسه زي خدمات الدفع الاونلاين اللي مش مرتبطة بعنوان ولا تليفون او اعلانات زي Facebook Ads وخد بالك لما بتيجي تشتكي للبنك ، البنك بيعتذرلك ويقولك منقدرش نسترد المبلغ .. المشكلة أن ممكن عملية السحب توصل لارقام كبيرة بالـ ١٠٠ الف جنيه وأكتر!
٥ ـ نصيحة مهمة جدا .. أأمن طريقة انك تطلب Prepaid Card مسبوق الدفع من البنك وبيكون رخيص جداً، وفضيه تماما من أي فلوس، وقبل كل عملية دفع تشحنه من الابليكيشن الخاص بالبنك بنفس قيمة الطلب وبعدين تتمم عملية الشراء في نفس الوقت بحيث يصفر تاني، لكن لو معاك Credit Card مفتوح صدقني خبطته وحشة أوي!
٦ ـ متبعتوش يا جماعة ولا تملوا حد أرقام حساباتكم وأرقامكم السرية على الواتساب ولا الماسنجر حتى لو صحابكم، ولو جالكم اتصال من أي شخص يدعي أنه مندوب البنك، ويطلب أرقامكم السرية أو أرقام ظهر الكارت أو رقم سري الخاص بالـATM إياكم تملوه أي رقم.
٧ ـ أخيرا.. نبهوا على كبار السن أن الكارت اللي ماسكه في إيده، بمثابة أنه ماسك حسابه بالكامل في ايده، كلموهم بلغتهم هما وفهموهم مينفعش أبدا نتساهل ولا نسلمه لحد ف الشارع يسحبلنا ولا نسيبه في ايد بياع ببساطة.
