12 مليار دولار للقهوة بس.. مين أكبر مستورد في العالم؟

مين أكتر دولة في العالم بتستورد قهوة المفاجأة إن الدولة دي مش من الدول المنتجة للقهوة.. دي الولايات المتحدة الأمريكية، اللي استوردت قهوة بقيمة حوالي 12.8 مليار دولار خلال 2025، لتتصدر العالم بفارق كبير.

وبعد أمريكا جت ألمانيا بـ8.9 مليار دولار، ثم إيطاليا بـ4.6 مليار، وفرنسا بـ4.4 مليار دولار.

أما إسبانيا فجت في المركز الخامس بـ2.7 مليار دولار، وبعدها كندا وبلجيكا واليابان وهولندا وبريطانيا.

واللافت إن واردات القهوة عالميًا حققت قفزة كبيرة خلال 2025، ووصل إجمالي مشتريات الدول من القهوة المستوردة إلى حوالي 71.8 مليار دولار، بزيادة 38.3% عن 2024.

والـ5 الكبار، أمريكا وألمانيا وإيطاليا وفرنسا وإسبانيا، استحوذوا لوحدهم على حوالي 46.4% من قيمة واردات القهوة العالمية.

أما أوروبا، فكانت أكبر منطقة مستوردة للقهوة من حيث القيمة، بحوالي 40.8 مليار دولار خلال 2025، أي أكتر من نصف الإجمالي العالمي.

والسبب إن القهوة مش مجرد مشروب.. دي واحدة من أهم السلع الزراعية المتداولة عالميًا، وإنتاجها مركز بشكل أساسي في المناطق الاستوائية، وعلى رأسها البرازيل وفيتنام وكولومبيا.

يعني الدول اللي بتزرع القهوة مش هي بالضرورة اللي بتستهلك أو تستورد أكتر، وأمريكا لوحدها دفعت 12.8 مليار دولار عشان توفر القهوة لسوقها خلال سنة واحدة.