3 آلاف فرصة لتأهيل مدربين عالميين.. شراكة جديدة بين مصر وسيسكو في التكنولوجيا

فرصة جديدة للشباب المصري عشان يدخلوا عالم التكنولوجيا من أوسع أبوابه.

الحكومة المصرية وقّعت مذكرة تفاهم مع شركة سيسكو العالمية لتدريب وتأهيل 3 آلاف مدرب معتمد دوليًا خلال 3 سنين.

يعني كل سنة هيتم تدريب 1000 مدرب، في تخصصات مهمة جدًا زي شبكات البيانات، وأمن المعلومات، وأنظمة التشغيل، وكمان الذكاء الاصطناعي.

والميزة هنا أن المدربين بعد حصولهم على الاعتماد الدولي، هيقدروا يشتغلوا كمدربين معتمدين جوه مصر وبره مصر.

والبرنامج مش موجه للشباب بس، لكنه كمان بيستهدف أساتذة الجامعات وأعضاء هيئات التدريس والمحاضرين المستقلين، عشان ينقلوا أحدث الخبرات والمعايير العالمية للمتدربين.

والهدف في النهاية هو بناء قاعدة قوية من الكوادر الرقمية، وتأهيل الشباب لوظائف المستقبل، وفتح فرص عمل أكبر قدامهم في مصر والأسواق العالمية.

من الآخر، مصر مش بس بتدرب شبابها، دي بتبني مدربين قادرين يعلّموا أجيال جديدة تكنولوجيا بمواصفات عالمية.