7 مليارات دولار دخلوا مصر من الكيماويات والأسمدة.. قطاع غير بترولي بيحقق أرقام تقيلة
قطاع الكيماويات والأسمدة في مصر بيحقق أرقام تقيلة جدًا.. صادراته عدّت حاجز الـ7 مليارات دولار خلال أول 7 شهور من 2026.
الصادرات وصلت لـ7.065 مليار دولار من يناير لحد يوليو، مقابل 5.633 مليار دولار في نفس الفترة من السنة اللي فاتت، يعني زيادة بأكتر من مليار و400 مليون دولار، وبنمو وصل لـ25%.
والرقم ده خلّى قطاع الكيماويات والأسمدة يفضل في صدارة القطاعات التصديرية غير البترولية في مصر، بحصة وصلت لحوالي 23.5% من إجمالي الصادرات غير البترولية خلال الفترة دي.
واللافت إن النمو مش جاي من منتج واحد.. البتروكيماويات كانت من أبرز القطاعات اللي قادت الزيادة، بصادرات وصلت لـ1.775 مليار دولار، بعد نمو ضخم بلغ حوالي 85%.
وكمان صادرات الكيماويات العضوية زادت 44%، والكيماويات غير العضوية ارتفعت 30%، والمنظفات سجلت نمو حوالي 29%، مع استمرار نمو صادرات الأسمدة واللدائن البلاستيكية.
أما الأسواق الخارجية، فالمنتجات المصرية بتوسع حضورها بشكل واضح.. والاتحاد الأوروبي تصدر التكتلات المستوردة بقيمة صادرات وصلت لحوالي 2.66 مليار دولار، بنمو 17%.
وفي آسيا غير العربية، الصادرات قفزت بنسبة 76% لتوصل لحوالي 1.715 مليار دولار، بينما الصادرات للولايات المتحدة زادت بنحو 70%.
وده معناه إن القطاع مش بس بيحقق زيادة في قيمة الصادرات، لكنه كمان بيوسع أسواقه وبيحاول يفتح أسواق جديدة قدام المنتج المصري.
ومع استمرار التوسع في الأسواق العالمية، مصر بتراهن على قطاع الكيماويات والأسمدة كواحد من أهم مصادر زيادة الصادرات غير البترولية، وجلب العملة الصعبة، وزيادة القيمة المضافة للمنتج المصري.
يعني الـ7 مليارات دولار مش مجرد رقم في صادرات 7 شهور.. دي إشارة إن قطاع صناعي مصري بقى لاعب مهم في الأسواق العالمية، ولسه مستهدف يوسع حضوره أكتر خلال الفترة الجاية.
