عايز تخلص مصالحك من البيت؟.. اعرف إزاي تسجل على بوابة مصر الرقمية

لو عايز تخلص خدماتك الحكومية من غير زحمة ولا طوابير، تقدر تستخدم بوابة مصر الرقمية من البيت وبكل سهولة.

البوابة بتوفر أكتر من 135 خدمة حكومية في مجالات مختلفة، زي التموين، المرور، الشهر العقاري، الأحوال المدنية والسجل التجاري.

ولو أول مرة تستخدمها، التسجيل بسيط جدًا.. تدخل على بوابة مصر الرقمية، وتختار «إنشاء حساب جديد»، وبعد كده تكتب الرقم القومي، واسم الأم، ورقم الموبايل، والبريد الإلكتروني لو حابب.

بعدها هيوصلك كود مكون من 6 أرقام على موبايلك، تدخله علشان تفعل الحساب، وتختار كلمة مرور قوية.

وبعد إنشاء الحساب، تقدر تستفيد من خدمات كتير، زي إصدار بطاقة تموين، إضافة أفراد، تجديد رخصة العربية، استخراج شهادات الميلاد، والتوكيلات.

وكمان تقدر تتابع طلباتك وتدفع الرسوم إلكترونيًا، من غير ما تضطر تروح المصلحة الحكومية.