لقيت قرض باسمك وأنت متعرفش؟ اعرف إزاي تكشف موقفك الائتماني في دقائق
تخيل تكتشف فجأة أن فيه قرض متسجل باسمك ورقمك القومي، وإنت أصلًا ما مضيتش على أي عقد ولا تعرف عنه حاجة!
ده اللي أثار قلق بعض أولياء الأمور في إحدى المدارس الدولية، بعد اكتشاف قروض مسجلة بأرقامهم القومية دون علمهم.
وعشان تتأكد أن مفيش أي تسهيلات أو التزامات مالية متسجلة باسمك، تقدر تستعلم عن التقرير الائتماني من خلال منصة مصر الرقمية.
الخطوات بسيطة، تدخل على الموقع أو التطبيق الرسمي لمصر الرقمية، وتسجل الدخول بحسابك، أو تعمل حساب جديد لو معندكش.
بعد كده تختار قسم التمويل والائتمان، وتدخل على خدمة الاستعلام عن التقرير الائتماني.
هيُطلب منك استكمال إجراءات التحقق من هويتك، وبعدها تقدر تشوف البيانات المسجلة باسمك، والتسهيلات الائتمانية، والالتزامات المالية، ومواعيد السداد، وكمان درجتك الائتمانية.
والأهم أنك تراجع بياناتك باستمرار، عشان تكتشف أي مشكلة بدري، وتحافظ على بياناتك وحقوقك المالية.
