قبل ما تنقل عداد الكهرباء باسمك.. 5 خطوات وأوراق لازم تجهزهم عشان ما تتعطلش
اشتريت شقة جديدة أو أنشأت محلك وعايز تنقل عداد الكهرباء باسمك؟
عشان تضمن حقوقك وتظبط أمورك.. اسمع التفاصيل دي كويس عشان تخلص إجراءاتك من أول مرة وما تضيعش وقتك.
عشان تمشي في الإجراءات صح ومن غير أي تعطيل، فيه مجموعة أوراق وخطوات أساسية لازم تكون مجهزها معاك قبل ما تروح شركة الكهرباء التابع ليها:
أول حاجة، هتحتاج صوره بطاقة الرقم القومي للمالك الجديد مع الأصل للإطلاع، وعقد الملكية أو الإيجار المسجل الموثق بالشقة أو العين.. ده غير تنازل رسمي وموثق في الشهر العقاري من المالك القديم للمالك الجديد، أو حضور المالك القديم شخصياً للتنازل في الشركة.
ثاني حاجة، لازم تجيب أخر فاتورة كهرباء مسددة بالكامل، وتعمل معاينة ميدانية من الشركة عشان يتأكدوا من سلامة العداد وعدم وجود أي مخالفات أو تراكمات مالية قديمة.
بعد ما تقدم الأوراق وتسدد الرسوم المقررة، بيتم نقل ملكية العداد باسمك رسمياً وتحديث البيانات في السيستم.
