حولت فلوس بالغلط على إنستا باي.. تعمل إيه؟
يا ترى تعمل إيه لو حولت فلوس بالغلط على إنستا باي والمبلغ راح لحساب شخص تاني والعملية اتنفذت ومش عارف ترجع فلوسك.
أول حاجة.. ما تتأخرش في التحرك.. لو التحويل تم بالفعل تواصل فورًا مع البنك بتاعك، وقدم تفاصيل العملية ورقم المعاملة ووضح إن التحويل تم بالخطأ.
ولو تعرف الشخص اللي اتحولت له الفلوس تقدر تتواصل معاه وتطلب منه يرجع المبلغ.
لكن خد بالك.. التحويل الناجح مش معناه إنك تقدر تلغيه بضغطة زر من التطبيق.
وعشان كده احتفظ برقم العملية ووقت التحويل وقيمة المبلغ وكل البيانات اللي تثبت العملية.
ولو التحويل كان نتيجة احتيال أو خداع متكتفيش بالتواصل مع البنك بس واتخذ الإجراءات الرسمية اللازمة.
وأهم نصيحة قبل ما تضغط تأكيد أي تحويل على إنستا باي.. راجع اسم المستفيد ورقم الحساب أو الموبايل والمبلغ مرة واتنين وتلاتة لأن ثواني هتقضيها في المراجعة ممكن توفر عليك مشكلة كبيرة.
