خطوة لازم تعملها فورا.. إزاي تعرف الأرقام المتسجلة باسمك في شركات الاتصالات؟

ياترى فيه كام خط محمول متسجل باسمك وإنت مش عارفه.. الموضوع مش مجرد رقم زيادة ومش بتستخدمه لأن أي خط متسجل باسمك ممكن تكون مسؤوليته القانونية عليك حتى لو إنت مش اللي بتستخدمه.

وعشان تعرف الحقيقة بنفسك كل اللي عليك إنك تدخل على تطبيق My NTRA وتستخدم خدمة أرقامي.

الخدمة بتعرضلك كل خطوط المحمول المسجلة برقمك القومي لدى شركات المحمول الأربع.

يعني في ثواني تقدر تعرف هل كل الأرقام اللي ظاهرة قدامك فعلًا بتاعتك وبتستخدمها ولا فيه خط غريب إنت أصلًا مش فاكر إنك امتلكته.

طيب لو لقيت رقم مش بتعرفه تعمل إيه؟

متتجاهلش الموضوع وروح فرع شركة المحمول التابعة للخط عشان تتأكد من بياناته وتعرف موقفه.

ولو ثبت إن الخط مسجل باسمك وإنت مش بتستخدمه تقدر تطلب إلغائه أو تعمل الإجراءات اللازمة طبقًا لضوابط شركة الاتصالات.

وفي نقطة مهمة جدًا لو إنت كنت مدي خط لابنك أو قريبك أو أي شخص تاني فالأفضل تنقل ملكيته للمستخدم الفعلي بمجرد توافر الشروط القانونية.

لأن المشكلة إن الخط ممكن يفضل مسجل باسمك حتى بعد ما ينتقل استخدامه لشخص تاني.

وعشان كده راجع خدمة أرقامي بشكل دوري ومتسيبش خطوط مش بتستخدمها باسمك واحتفظ بعقود شراء الخطوط وأوراق التنازل.

والأهم لو ظهر قدامك رقم مجهول متأجلش الموضوع لأنك ببساطة ممكن تكون مسؤول قانونيًا عن استخدام خط إنت أصلًا مش عارف إنه موجود.

يعني قبل ما تقول أنا معنديش غير رقمي أو رقمين افتح خدمة أرقامي وشوف بنفسك رقمك القومي مسجل عليه كام خط.