مسافر بره مصر؟.. تقدر تشحن عداد الكهرباء الذكي من مكانك

مسافر بره مصر وقلقان إن رصيد عداد الكهرباء يخلص وإنت بعيد؟

متقلقش.. لو عندك عداد كهرباء ذكي، تقدر تشحنه وإنت في أي مكان في العالم، من غير ما تحتاج تكون موجود في البيت.

العداد الذكي متصل بشبكة المحمول، وكمان بنظام سحابي إلكتروني، وده بيسمحلك تتابع وتدير العداد عن بُعد.

كل اللي عليك إنك تستخدم التطبيقات المخصصة للشحن، زي سهل أو خالص، وتنفذ عملية الشحن من موبايلك.

وبمجرد إتمام العملية، إشارة الشحن بتوصل للعداد الموجود في بيتك مباشرة، من غير ما تحتاج تروح عند العداد أو تدخل الكارت بنفسك.

والعداد الذكي مش بس بيسمحلك بالشحن عن بعد.. ده كمان بيسجل استهلاكك، ويرصد الأعطال ومحاولات التلاعب، وبيبعت القراءات بشكل آلي لشركة الكهرباء.

يعني لو مسافر.. تقدر تطمن على كهرباء بيتك وإنت في مكانك.