شقتك الإيجار هتبقى ملكك.. وزارة الإسكان تعلن أكبر مفاجأة للشباب والأسر

لو نفسك تمتلك شقة، لكن الأسعار بقت فوق طاقتك، أو كل شوية تقول هتجوز إزاي وهسكن فين.. يبقى ركز معايا في الخبر ده، لأن وزارة الإسكان أعلنت عن مفاجأة ممكن تغير حياة ناس كتير.

الوزارة أعلنت رسميًا إنها هتطرح 5000 شقة بنظام الإيجار المنتهي بالتملك في 25 مدينة جديدة، والطرح هيكون خلال شهر من دلوقتي.

يعني إيه إيجار منتهي بالتملك؟

ببساطة.. هتسكن في الشقة، وتدفع إيجارها بشكل منتظم لمدة 20 سنة، ومع نهاية المدة، الشقة هتبقى ملكك رسميًا.

والأهم إن الشقق جاهزة على المفتاح، يعني مبنية بالفعل، وإجراءات التخصيص والاستلام هتكون أسرع بكتير من أي طروحات لسه تحت الإنشاء.

كمان التخصيص هيكون عن طريق قرعة علنية بين الناس اللي مستوفية الشروط، علشان تكون الفرصة متساوية للجميع.

وفي خبر مهم، 5% من الوحدات مخصصة لذوي الهمم.

طيب مين يقدر يقدم؟

لازم يكون سنك من 21 لـ45 سنة وقت التقديم.

وكمان ما يكونش سبق ليك، أو لزوجتك أو جوزك، أو لأولادك القصر، إنكم امتلكتوا شقة أو قطعة أرض قبل كده، سواء من الدولة أو من أي جهة تانية.

وكل أسرة ليها حق التقديم على وحدة واحدة فقط.

أما التقديم، فبيكون حسب المحافظة المكتوبة في البطاقة، ولو محافظتك مفيهاش وحدات، تقدر تقدم في أقرب مدينة ليك، حسب اللي هيكون موجود في كراسة الشروط.

ولو اسمك طلع في القرعة، هيكون مطلوب منك تدفع تأمين يعادل إيجار 3 شهور خلال 30 يوم من إخطارك.

دلوقتي يمكن أهم سؤال... إمتى التقديم؟

وزارة الإسكان أعلنت إن كراسة الشروط هتنزل خلال شهر، وهتكون فيها كل التفاصيل، من أماكن الشقق، والمساحات، وقيمة الإيجار، وكمان الحد الأقصى للدخل المطلوب.