مشروع مصري صيني هيقلب الموازين.. التنين الصيني داخل بتقله
يا ترى ايه حكاية التعاون الضخم اللي هيتم بين مصر والصين في مجال البتروكيماويات؟ وهل التعاون ده هيغير فعلا شكل الصناعة في مصر ؟ وليه الحكومة مستعجلة بالشكل ده على تنفيذها؟ وايه سر التركيز على صناعة اسمها الصودا آش؟ وليه المشروع ده بيتقال عليه مشروع استراتيجي؟ وهل التعاون الجديد ده هيقلل الاستيراد ويزود الصادرات ويخلق فرص شغل جديدة ولا لأ؟
فيه لقاء مهم جدا جمع المهندس كريم بدوي وزير البترول والثروة المعدنية مع مدير عام مجموعة الصين الوطنية للهندسة الكيميائية واللي كان هدفه الأساسي تسريع تنفيذ مجموعة من أكبر المشروعات الصناعية والبتروكيماوية اللي بتتجهز حاليا في مصر واللي الدولة شايفاها خطوة مهمة في خطة توطين الصناعة وزيادة القيمة المضافة بدل ما مصر تفضل تستورد منتجات بتكلفها مليارات كل سنة.
طيب ايه أول مشروع الدولة مركزة عليه وليه واخد كل الاهتمام ده؟
المشروع الأول هو مشروع إنتاج الصودا آش في مدينة العلمين الجديدة ويمكن ناس كتير أول مرة تسمع الاسم لكن الحقيقة إن المادة دي بتدخل في صناعات كتير جدا زي الزجاج والمنظفات والكيماويات وعدد كبير من الصناعات الثقيلة ومصر لحد النهارده بتستورد المنتج ده من الخارج وبتدفع فيه عملة صعبة كل سنة عشان كده الحكومة شايفة إن تصنيع الصودا آش داخل مصر هيحقق مكاسب كبيرة لأنه هيقلل الاستيراد ويوفر الدولار وفي نفس الوقت يخلق صناعة جديدة تعتمد على الإنتاج المحلي.
وهل الهدف مجرد إنشاء مصنع جديد؟
الحقيقة لأ لأن الحكومة بتتكلم كمان عن زيادة نسبة المكون المحلي داخل المشروع يعني أكبر جزء ممكن من المعدات والخدمات والخامات يتم توفيره من السوق المصري وده معناه تشغيل شركات محلية أكتر وزيادة فرص العمل وتعظيم العائد الاقتصادي من المشروع بدل ما أغلب الفلوس تخرج بره البلد.
طب ايه حكاية مجمع البحر الأحمر الوطني للبتروكيماويات؟ وليه بيتوصف إنه واحد من أكبر المشروعات اللي بتتجهز حاليا؟
الحقيقة إن المجمع ده هيكون من المشروعات الضخمة اللي هتنتج منتجات بترولية وبتروكيماوية عالية القيمة يعني بدل ما نصدر مواد خام أو منتجات قليلة القيمة مصر هتدخل مرحلة تصنيع منتجات سعرها أعلى وعائدها أكبر وده بيحقق قيمة مضافة للاقتصاد ويفتح أبواب جديدة للتصدير.
المهم كمان إن المشروع مستفيد من موقع مصر الجغرافي والبنية التحتية اللي اتطورت خلال السنوات الأخيرة خاصة في المنطقة الاقتصادية لقناة السويس وده بيدي فرصة إن المنتجات المصرية توصل بسرعة لأسواق كتير في أوروبا وآسيا وإفريقيا ويخلي مصر مركز مهم لتجارة وتداول المنتجات البترولية والبتروكيماوية.
طيب ليه الصين بالتحديد شريك أساسي في المشروعات دي؟
لأن العلاقات الاقتصادية بين مصر والصين شهدت نمو كبير خلال الفترة الأخيرة وقطاع البترول والثروة المعدنية بقى واحد من أهم مجالات التعاون بين البلدين والشركات الصينية بقت بتشارك في تنفيذ استثمارات ضخمة داخل مصر بدعم من القيادة السياسية اللي بتعتبر إن الصناعة هي الطريق الحقيقي لزيادة الإنتاج وتقليل فاتورة الواردات.
وده اللي أكده وزير البترول لما أوضح إن المشروعات دي مش مجرد استثمارات عادية لكنها مشروعات استراتيجية بتحظى بمتابعة مستمرة لأنها بتخدم هدف أكبر وهو تعميق التصنيع المحلي وفتح أسواق جديدة أمام الصادرات المصرية وتقليل الاعتماد على المنتجات المستوردة.
