صدمة في سوق السيارات.. الدولار يقلب حسابات الوكلاء ويوقف التخفيضات المنتظرة

هل أسعار السيارات هتنزل ولا الدولار قلب الحسابات من جديد؟ وليه وكلاء السيارات وقفوا التخفيضات رغم هدوء السوق قبل أيام؟ إيه علاقة الدولار بحركة أسعار السيارات في مصر وليه المشترين مستنيين؟

دلوقتي أي حد بيفكر يشتري عربية بقى عنده كام سؤال مهم هل الوقت مناسب للشراء ولا الأفضل يستنى وهل الأسعار هتنزل فعلا ولا ترجع ترتفع من جديد وليه شركات السيارات وقفت التخفيضات اللي كانت بتحضر لها من أيام قليلة وإيه علاقة الدولار بكل اللي بيحصل في السوق.

الحكاية بدأت لما الدولار نزل قبل حوالي أسبوعين ووصل لمستوى قريب من 49 جنيه ومع هدوء التوترات الجيوسياسية بدأت شركات ووكلاء السيارات يجهزوا لإطلاق موجة تخفيضات جديدة على عدد من الطرازات لأن تكلفة الاستيراد كانت ماشية في اتجاه أفضل والسوق كان مستني خطوة تشجع الناس على الشراء لكن فجأة الصورة اتغيرت بالكامل بعد تجدد التصعيد بين الولايات المتحدة وإيران ورجوع الدولار للارتفاع مرة تانية لأكتر من 51.30 جنيه وده خلا شركات كتير توقف كل خطط إعادة التسعير وتدخل في مرحلة انتظار لحد ما تتضح الرؤية.

طيب ليه الدولار مؤثر بالشكل الكبير ده على أسعار العربيات؟

لأن أغلب السيارات أو مكوناتها بيتم استيرادها من الخارج وكل زيادة في سعر الدولار معناها زيادة مباشرة في تكلفة الاستيراد وبالتالي أي شركة هتفكر ألف مرة قبل ما تعلن تخفيضات وهي مش عارفة الدولار هيقف عند كام بعد أيام قليلة وعلشان كده السوق دخل في حالة من الترقب والارتباك سواء عند الشركات أو عند المشترين.

النتيجة كانت واضحة جدا لأن الطلب على السيارات بدأ يهدى بشكل ملحوظ رغم إننا دخلنا موسم الصيف اللي بيعتبر في العادة أقوى موسم لمبيعات السيارات في مصر لكن المستهلك بقى بيسأل نفسه ليه أشتري النهارده لو ممكن الأسعار تنزل بعد شهر وفي نفس الوقت الشركة بتسأل نفسها ليه أخفض الأسعار النهارده لو الدولار ممكن يطلع بكرة وده خلق حالة جمود خلت السوق كله واقف مستني.

طيب هل في شركات كانت بدأت تخفض الأسعار بالفعل؟

الحقيقة إن بعض العلامات التجارية زي إم جي وجاك قدمت تخفيضات محدودة وقت ما الدولار كان نازل لكن مع رجوع العملة الأمريكية للارتفاع بقى فيه احتمال كبير إن الشركات تعيد حساباتها لأن أغلب الشركات أصلا كانت مسعرة سياراتها على أساس دولار مرتفع وبالتالي الاتجاه الحالي مش هو التخفيض لكنه الحفاظ على الأسعار الحالية لحين استقرار السوق.

لكن فيه نقطة مهمة ناس كتير مش واخدة بالها منها وهي إن أسعار السيارات مش بتتغير أول ما الدولار يطلع أو ينزل لأن دورة استيراد السيارات طويلة وبتوصل من 3 إلى 4 شهور والشركة لما بتجيب شحنة جديدة بتكون وفرت الدولار وفتحت الاعتمادات قبل وصول العربيات بفترة طويلة وعلشان كده لو الدولار نزل النهارده مش شرط تشوف تخفيض بكرة لأن العربيات الموجودة حاليا ممكن تكون مستوردة على سعر صرف أعلى.

في المقابل لو الدولار ارتفع بيكون تأثيره أسرع لأن الشركات بتحسب تكلفة الشحنات الجديدة وتبدأ تحط في اعتبارها زيادة تكلفة الاستيراد المستقبلية وده بيديها دافع إنها تحافظ على الأسعار أو حتى ترفعها لو استمرت الضغوط لفترة أطول.

طيب هل الدولار هو العامل الوحيد في تسعير السيارات؟

لا طبعا.. لأن العرض والطلب ليهم دور مهم جدا الشركة اللي عندها مخزون كبير من السيارات تقدر تستحمل وتحافظ على أسعارها لفترة أطول أما الشركة اللي مخزونها قليل فبتحط هامش أمان أكبر تحسبا لأي زيادة جديدة في تكلفة الاستيراد أو أي صعوبة في توفير سيارات جديدة.

وده اللي مفسر ليه السوق حاليا فيه استقرار نسبي في الأسعار رغم إن حركة البيع بطيئة لأن فيه تجار عندهم مخزون وبيحاولوا يصرفوه من غير ما يخسروا وفي نفس الوقت المشترين مأجلين قرار الشراء على أمل إن الأسعار تنزل خلال الفترة الجاية.

وعلشان يحركوا السوق بعض التجار بدأوا يقدموا عروض مختلفة بدل ما يخفضوا سعر العربية نفسها زي برامج الكاش باك أو التقسيط بدون فوائد أو تسهيلات في السداد لفترات معينة ودي تعتبر محاولة لتنشيط المبيعات من غير المساس بالقوائم السعرية الرسمية.