سبب جديد هيوقف بطاقة التموين.. الحكومة تبدأ تطبيق استبعاد أصحاب الدخول المرتفعة

لو مرتبك أو دخلك الشهري عالي يبقى لازم تراجع موقفك فورا لأن وزارة التموين بدأت رسميا تطبيق سبب ومحدد جديد لحذف المواطنين من الدعم وده ضمن خطة تصفية قواعد البيانات وتوجيه الدعم للناس الأكثر احتياجا.

المستندات الرسمية كشفت إن الاستبعاد الجديد هيشمل أي أسرة أو مواطن بيوصل دخله الشهري لـ 24 ألف جنيه وده بينضم لقايمة طويلة طيرت أكتر من 850 ألف مواطن من الدعم خلال الفترة الأخيرة.

الاستبعادات السابقة شملت الناس اللي عايشة في كمبوندات سكنية والأهالي اللي مدخلين أولادهم مدارس دولية ومالكي العربيات الحديثة وأصحاب الشركات والسجلات التجارية وكمان اللي اتعملت ضدهم محاضر سرقة كهرباء أو بيمتلكوا أكتر من 10 أفدنة زراعية.

الوزارة طمنت الناس إن التنقية مش هتمس الفئات الأكثر فقرا والأولى بالرعاية وفيه فرصة لتقديم تظلم لو شايف إن الاستبعاد مش بينطبق عليك وده من خلال تحديث البيانات على منصة مصر الرقمية والتوجه لمكتب التموين بالمستندات المطلوبة.

قولنا انت بقى شايف محدد الدخل الجديد ده عادل وهيساهم في توجيه الدعم لمستحقيه بجد ولا لأ.