الدولار قلب الموازين.. ليه الجنيه خسر مكاسبه رغم الاحتياطي التاريخي وتحويلات المصريين؟
أول ما تشوف الدولار بيرجع يطلع تاني طبيعي تسأل هو إيه اللي حصل؟ وليه الجنيه رجع يتراجع بعد ما كان بيحقق مكاسب؟ ووهل خروج جزء من الأموال الساخنة هو السبب الرئيسي وراء عودة العملة الأمريكية للصعود؟ وإزاي ده بيحصل رغم إن احتياطي النقد الأجنبي وصل لأعلى رقم في تاريخ مصر ورغم إن تحويلات المصريين في الخارج والأموال الأجنبية كانت محققة أرقام كبيرة؟
سعر الدولار رجع يحقق مكاسب جديدة خلال تعاملات النهاردة وكمل رحلة الصعود اللي بدأها خلال الأيام اللي فاتت والعملة الأمريكية قربت مرة تانية من مستوى 50 جنيه في أغلب البنوك المصرية وده حصل في وقت رجعت فيه التوترات الجيوسياسية تضغط على الأسواق وتخلي المستثمرين يتحركوا ناحية الدولار باعتباره ملاذ أكتر أمان وقت الأزمات وده انعكس بشكل مباشر على الجنيه المصري اللي تعرض لضغوط جديدة بعد فترة من التحسن.
ولو بصينا على أسعار الصرف هنلاقي إن أعلى سعر للدولار اتسجل في بنوك أبوظبي الإسلامي وقناة السويس وسايب وميد بنك عند 49.85 جنيه للشراء و49.95 جنيه للبيع بينما أقل سعر كان في بنك الإمارات دبي الوطني عند 49.55 جنيه للشراء و49.65 جنيه للبيع وفي بنوك الأهلي المصري والتجاري الدولي والإسكندرية وبيت التمويل الكويتي وأبوظبي الأول والمصرف المتحد والمصرف العربي والعربي الأفريقي وصل الدولار إلى 49.82 جنيه للشراء و49.92 جنيه للبيع أما في البنك المركزي فسجل 49.63 جنيه للشراء و49.77 جنيه للبيع وده معناه إن الدولار بقى قريب جدا من حاجز 50 جنيه من جديد.
طيب السؤال المهم هو ليه الدولار بيطلع رغم إن مصر كانت استقبلت تدفقات كبيرة من الأموال الأجنبية؟
بص يا سيدي.. الأسواق المالية بتتأثر بسرعة بأي توترات سياسية أو عسكرية في المنطقة ولما المخاطر بتزيد جزء من المستثمرين الأجانب بيفضل يخرج من الأسواق الناشئة بشكل مؤقت ويحط فلوسه في أصول أقل مخاطرة وده اللي حصل بالفعل بعد ما سجلت تعاملات العرب والأجانب في السوق الثانوية للدين الحكومي المصري صافي بيع بقيمة 187 مليون دولار خلال تعاملات يوم الأربعاء الماضي بعد أيام قليلة من تسجيل صافي شراء وصل إلى 554 مليون دولار.
لكن هل ده معناه إن الأموال الأجنبية خرجت بالكامل من مصر ؟
لا مش كده بالظبط.. لأن الصورة الكاملة مختلفة تماما وخلال شهر 6 لوحده سجلت السوق صافي شراء بقيمة 8.76 مليار دولار بينما وصلت تدفقات الأموال الساخنة خلال الربع الثاني من 2026 إلى 11.66 مليار دولار وحوالي 11.6 مليار دولار منذ بداية السنة وده معناه إن التخارج الأخير لسه محدود مقارنة بحجم التدفقات الكبيرة اللي دخلت السوق خلال الشهور الماضية.
وهنا ييجي سؤال تاني وهو هل الجنيه فقد كل عوامل القوة؟
والإجابة برضه لا لأن في عوامل قوية جدا لسه بتدعمه أولها إن احتياطي النقد الأجنبي وصل في نهاية شهر 6 إلى 55.07 مليار دولار بزيادة 1.93 مليار دولار عن شهر 5 وده أعلى مستوى في تاريخ مصر ووجود احتياطي بالحجم ده بيدي الاقتصاد قدرة أكبر على مواجهة أي ضغوط خارجية وتوفير احتياجات الدولة من العملة الأجنبية.
كمان مصادر دخول الدولار للاقتصاد المصري شهدت تحسن واضح خلال الفترة الأخيرة سواء من الصادرات أو السياحة أو تحويلات المصريين العاملين بالخارج ودي نقطة مهمة جدا لأن أي اقتصاد بيحتاج مصادر مستمرة للدولار مش مجرد تدفقات استثمارية قصيرة الأجل وده اللي ظهر في أرقام التحويلات اللي حققت قفزات غير مسبوقة.
طيب هل ارتفاع الدولار الحالي معناه إن الاتجاه اتغير بالكامل؟
الأسواق لسه بتتحرك حسب الأخبار والتطورات الجيوسياسية ولو التوترات الحالية هديت ممكن نشوف هدوء جديد في سوق الصرف لكن لو استمرت الضغوط العالمية والإقليمية فمن الطبيعي يفضل الدولار تحت ضغط صعودي لفترة وده بيخلي المرحلة الحالية محتاجة متابعة مستمرة لأي تطورات سواء على المستوى السياسي أو الاقتصادي.
