بشرى للشباب.. شقق الإيجار التمليكي راجعة من جديد

لو نفسك تمتلك شقة لكن أسعار الشراء صعبة، فالإيجار التمليكي ممكن يكون الحل المناسب ليك. وزارة الإسكان بتستعد تطرح من 10 لـ15 ألف شقة كمرحلة أولى خلال شهر أو شهر ونص، مخصصة لمحدودي الدخل.

الفكرة إنك تسكن في الشقة مقابل إيجار شهري، وبعد الالتزام بالسداد تقدر تحولها لتمليك وفق ضوابط الوزارة.

الشروط بتقول إن سن المتقدم يكون من 21 لـ35 سنة، ويكون حديث الزواج، وكمان من سكان أو العاملين بالمحافظة اللي هيحجز فيها.

لازم كمان ما يكونش استفاد قبل كده من الإسكان الاجتماعي أو يمتلك هو أو أسرته شقة. 

هتكون من 75 لـ90 متر، والشقق كاملة التشطيب وجاهزة للسكن، والأهم إن قيمة الإيجار مش هتزيد عن 25% من دخل المستفيد، علشان تكون مناسبة. والعقد هيكون 3 سنين مع إمكانية التجديد، وبعدها تقدر تبدأ خطوات التملك لو التزمت بكل الشروط المطلوبة.