بشرى لاصحاب العداد الكودي.. وزارة الكهرباء تعلن عن مفاجأة

انفراجة كبيرة لكل أصحاب العدادات الكودية.. وزارة الكهرباء أعلنت رسمياً عن بدء تحويل أكتر من مليون عداد كودي لـ عدادات قانونية شرعية.

المتحدث الرسمي باسم الوزارة منصور عبد الغني أكد إن الخطوة دي بتستهدف تنظيم حصول المباني المخالفة والتقسيمات الجديدة على التيار بشكل مستقر وآمن وبشرى حقيقية للناس اللي مستنية استقرار أوضاعها.

من ناحية تانية الملف ده شهد إنجاز كبير جداً وجرى تحويل حوالي 950 ألف عداد من كودي لقانوني فور تقديم مستندات التصالح وجدية الإجراءات ومن غير ما الناس تستنى الانتهاء الكامل من قضايا وجلسات التصالح.. يعني التوجيهات راحت لشركات التوزيع للتنفيذ فوراً تيسيراً على المواطنين وتوفيراً لوقتهم ومجهودهم.

كمان فيه حوالي 150 ألف عداد تانيين في مباني سليمة وغير مخالفة زي الوحدات المقسمة أو الأدوار الإضافية القانونية ودول شركات توزيع الكهرباء بدأت تحولهم تلقائياً لعدادات قانونية من غير ما أصحابها يقدموا أي طلبات.. الشبكة القومية بتضم دلوقتي حوالي 10 ملايين عداد كودي من إجمالي 46 مليون مشترك.