مفاجأة من صندوق النقد لمصر.. اتفاق جديد يمهد لدخول 1.6 مليار دولار
يا ترى ايه حكاية الاتفاق الجديد بين مصر وصندوق النقد ؟ وليه دلوقتي بالذات؟ وهل الـ 1.6 مليار دولار هيغيروا حاجة في الاقتصاد المصري؟ وليه الأسواق كانت مستنية نتيجة المراجعة السابعة؟ وإيه المكاسب اللي ممكن ترجع على الجنيه والدولار والاستثمار؟ ولو الاتفاق اتوافق عليه بشكل نهائي إيه اللي ممكن يحصل في الفترة الجاية؟
مصر وصلت لاتفاق على مستوى الخبراء مع صندوق النقد الدولي بخصوص المراجعة السابعة لبرنامج الإصلاح الاقتصادي وكمان المراجعة التانية لبرنامج الصلابة والاستدامة وده معناه إن الملف الفني خلص بنجاح ولسه الخطوة الأخيرة وهي عرض الاتفاق على المجلس التنفيذي للصندوق لاعتماده بشكل نهائي ولو ده حصل هتقدر مصر تحصل على حوالي 1.5 مليار دولار من برنامج التسهيل الممدد بالإضافة إلى 136 مليون دولار من برنامج الصلابة والاستدامة بإجمالي حوالي 1.6 مليار دولار تدخل الاحتياطي وتدعم موارد الدولة من النقد الأجنبي
طيب ليه الاتفاق ده مهم أصلا وليه الأسواق بتركز معاه؟
لأن موافقة خبراء الصندوق معناها إن برنامج الإصلاح ماشي في الاتجاه اللي كان متفق عليه وإن مصر حققت عدد كبير من المستهدفات الاقتصادية المطلوبة وده بيدي رسالة طمأنة للمؤسسات المالية العالمية والمستثمرين وصناديق الاستثمار إن الاقتصاد المصري ماشي في مسار الإصلاح وإن الدولة ملتزمة بتنفيذ البرنامج وده غالبا بيشجع دخول استثمارات جديدة ويقوي ثقة المستثمرين في السوق المصرية
طيب إيه تقييم صندوق النقد للاقتصاد المصري؟
الصندوق قال إن الاقتصاد المصري قدر يتعامل بشكل قوي مع الصدمة اللي حصلت بسبب الحرب في الشرق الأوسط وإن الإجراءات السريعة اللي اتاخدت ساعدت على تقليل آثار الأزمة بشكل واضح وفي نفس الوقت أكد إن الاقتصاد أظهر مرونة وقدرة على الاستمرار رغم الضغوط الخارجية لكن شدد برضه إن الإصلاحات لازم تكمل بنفس القوة لأن لسه فيه تحديات ومخاطر محتاجة متابعة
وإيه أهم الحاجات اللي الصندوق طالب باستمرارها؟
الصندوق أكد إن الأولوية دلوقتي هي إدارة الدين بشكل أفضل والسيطرة على التضخم وتحسين بيئة الاستثمار وتقليل دور الدولة في بعض الأنشطة الاقتصادية وزيادة مساحة القطاع الخاص وكمان استمرار الاهتمام بالفئات الأكثر احتياجا وتوسيع برامج الحماية الاجتماعية بحيث الإصلاح الاقتصادي يكمل من غير ما يحمل المواطنين أعباء أكبر
طيب وضع الاقتصاد نفسه أخباره إيه؟
الأرقام بتقول إن معدل النمو وصل إلى 5 بالمئة في الربع الثالث ومتوسط النمو خلال أول 9 شهور من السنة المالية وصل إلى 5.2 بالمئة ودي أرقام بتعكس استمرار النشاط الاقتصادي رغم الظروف العالمية والإقليمية الصعبة وفي نفس الوقت الاحتياطيات الدولية فضلت مستقرة بشكل كبير مع نهاية مارس 2026 رغم خروج جزء من استثمارات المحافظ المالية خلال فترة التوترات
وليه الجنيه بدأ يسترد جزء من قوته الفترة الأخيرة؟
لأن جزء كبير من الأموال الساخنة رجع للسوق المصرية بعد هدوء التوترات الإقليمية والإعلان عن الاتفاق بين الولايات المتحدة وإيران وده ساعد على عودة تدفقات المحافظ الاستثمارية من جديد وبالتالي عوض جزء كبير من الضغوط اللي كانت موجودة على سوق الصرف وخلّى الجنيه يستعيد جانب من مكاسبه قدام الدولار
طيب إيه المتوقع للفترة الجاية؟
الصندوق متوقع إن الفائض الأولي يرتفع من 4.8 بالمئة إلى 5 بالمئة خلال السنة المالية الجديدة وكمان متوقع زيادة نسبة الإيرادات الضريبية إلى الناتج المحلي بحوالي 1.2 بالمئة مع استمرار تطوير الإدارة الضريبية وتوسيع القاعدة الضريبية وده بيوفر للدولة موارد أكبر تقدر تستخدمها في زيادة الإنفاق على الخدمات وبرامج الحماية الاجتماعية
