منحة استثنائية أو علاوة جديدة.. رسالة أصحاب المعاشات للرئيس

تخيل كده إنك كل شهر مستني المعاش أو المرتب ييجي عشان تعرف تكمل باقي الشهر، وفجأة تلاقي الأسعار بتزيد أسرع من دخلك بكتير.

عشان كده نقابة أصحاب المعاشات وجهت رسالة للرئيس السيسي، وطالبت فيها بمنحة استثنائية أو علاوة إضافية بجانب الزيادة السنوية المقرر صرفها في يوليو، واللي متوقع إنها تكون 15%.

النقابة قالت إن ملايين أصحاب المعاشات بقوا بيواجهوا ضغوط معيشية صعبة، وإن الزيادة السنوية لوحدها ممكن متكونش كفاية لمواجهة ارتفاع الأسعار، خصوصًا مع زيادة تكاليف الأكل والعلاج والخدمات الأساسية.

كمان أكدت إن القانون بيدي لرئيس الجمهورية صلاحية إصدار منح أو علاوات استثنائية بشكل مباشر، وذكرت إن حصل قبل كده وتم صرف منح استثنائية لأصحاب المعاشات.

لكن لحد دلوقتي مفيش أي قرار رسمي صدر بخصوص منحة جديدة، وكل الموجود مجرد مطالبات ومقترحات منتظرة الحسم.

ودلوقتي قولنا رأيك هل الـ15% كفاية فعلًا لأصحاب المعاشات ولا محتاجين زيادة أو منحة استثنائية كمان؟