خلي بالك.. 10 مخالفات تطير منك عداد الكهرباء وتقطع الخدمة نهائيا

شركات توزيع الكهرباء كثفت حملاتها الرقابية بشكل كبير على مستوى الجمهورية.. الموضوع مبقاش هزار والكلام ودلوقتي ممكن يتم سحب العداد وقطع الخدمة مش بس عشان سرقة الكهرباء لا ده فيه مخالفات تانية كتير مالية وفنية وإدارية.

أولها الحالات المادية زي إنك تتأخر في سداد الفاتورة لمدة 30 يوم من تاريخ المطالبة أو ما تسددش فاتورتين ورا بعض وكمان لو امتنعت عن سداد المديونيات المتراكمة أو ما التزمتش بجدولة الأقساط..

نيجي بقى للمخالفات الفنية والإدارية ودي شركات الكهرباء بتتعامل معاها بحسم شديد زي العبث بالأختام الرسمية للعداد أو كسرها وعمل توصيلات غير قانوني

كمان لو وصلت كهرباء للغير من عدادك الخاص أو غيرت النشاط من منزلي لتجاري من غير ما تخطر الشركة..

كمان لو زودت الأحمال عن القدرة المتعاقد عليها أو منعت موظفي الشركة من قراءة العداد لدورتين ورا بعض وأخيراً لو هدمت العقار وعملت فيه تغييرات جوهرية.

أما بخصوص عداد الكارت فالوزارة طمنت الناس وقالت إن نفاد الرصيد مش معناه سحب العداد دي الخدمة بتقف مؤقتاً لحد ما تشحن بس لو حصل تلاعب في العداد أو الحساسات بتاعته بيتسحب فوراً..

وخلي بالك القانون الجديد فيه مقترحات بعقوبات بتوصل للحبس لمدة مش أقل من سنة وغرامات مالية تقيلة بتبدأ من 100 ألف وتوصل لمليون جنيه ده غير إن التصالح بيشترط سداد الاستهلاك المخالف على أعلى شريحة مع دفع تعويضات لشركة الكهرباء فبلاش مخاطرة.