لأول مرة من شهور.. انخفاض في أسعار الفراخ والبيض

لأول مرة من شهور.. انخفاض في أسعار الفراخ والبيض  يا ترى إيه اللي حصل في سوق الفراخ والبيض و ليه الأسعار نزلت فجأة؟

ناس كتير بدأت اشك واشاعات كتير بدأت تطلع وده بسبب في الهبوط في الأسعار.

لكن خليني اقولك أن الموضوع كله بسبب زيادة الإنتاج والوفرة الكبيرة اللي حصلت في المزارع مع تراجع القوة الشرائية شوية بعد موسم عيد الأضحى.

الأرقام بتقول إن الفراخ البيضاء في المزرعة نزلت لـ 60 جنيه بعد ما كانت بـ 80 من أيام وبتوصل للمستهلك بـ 73 جنيه بس.

والمفاجأة إن الفراخ الأمهات انخفضت لحد حوالي 45 جنيه في المزرعة وبتتباع للمستهلك بـ 57 جنيه.

الفراخ الساسو كمان سجلت 95 جنيه في المزرعة وبتوصل للمستهلك بـ 108 جنيه والبلدي بـ 120 في المزرعة وبتوصل لـ 130 جنيه.

والبانيه استقر تبعاً لده وبقى من 170 لـ 200 جنيه والأوراك من 70 لـ 90 والأجنحة من 70 لـ 80 جنيه وزوج الحمام بـ 190 جنيه.

اما المفاجأة بجد بقى كانت في كرتونة البيض الأحمر والأبيض اللي نزلت لـ 55 جنيه جملة وبتتباع للمستهلك من 80 لـ 85 جنيه بعد ما كانت بـ 140 جنيه والبيض البلدي بـ 100 جملة و110 للمستهلك.

الكلام ده أكده الدكتور ثروت الزيني نائب رئيس اتحاد منتجي الدواجن ووضح إن الموضوع كله خاضع للعرض والطلب والسوق شهد وفرة إنتاجية كبيرة وتحسن في قطاع الأعلاف وتوافر مستلزمات الإنتاج.

وأشار كمان إن مصر نجحت في تحقيق الاكتفاء الذاتي من صناعة الدواجن اللي بتوفر أكتر من 3.5 مليون فرصة عمل واستثماراتها بتعدي الـ 100 مليار جنيه.