غلطة بسيطة بتطير الرصيد.. خطأ الشائع عند شحن كارت الكهرباء
لو انت من أصحاب العداد ابو كارت ففيه حركة واحدة قبل الشحن هتحمي فلوسك.
شركة كهرباء جنوب القاهرة حذرت من خطأ شائع وبسيط جدا بيقع فيه ملايين المواطنين وقت شحن كارت العداد مسبق الدفع وبيكون السبب في إن الرصيد يطير ويتفاجئوا إن الكارت مفيش فيه فلوس بعد الشحن.
وده بسبب عدم وضع الكارت جوه العداد قبل ما تتوجه لمركز الشحن أو سحب الكارت من الماكينة قبل ما العملية تكمل للاخر وده بيمنع تحديث البيانات بالشكل الصحيح.
والمفاجأة إن الشركة وضحت الطريقة الصحيحة والمضمونة للشحن في خطوات بسيطة وهي إنك لازم تحط الكارت في العداد الأول وتستنى لحد ما بياناتك تظهر وتتحدث بالكامل وبعدين تاخده وتشحنه بالقيمة اللي عايزها ولما ترجع البيت تحطه في العداد تاني عشان ينقل الرصيد الجديد.
وجهاز تنظيم المرفق نصح لو واجهتك مشكلة بعد الشحن إنك تشيل الكارت وتحطه أكتر من مرة ولو منفعش تتوجه لخدمة العملاء فورا عشان يفحصوا الكارت والعداد وتضمن حقك ونورك يفضل شغال ومستقر.
