من غير زحمة ولا مشاوير.. خطوات سهلة لربط معاشك بمحفظة الموبايل

هتاخد معاشك وانت في بيتك ومن غير مشاوير.. لو بتزهق من طوابير صرف المعاشات وكل شهر تشيل هم المشاوير والزحمة والوقفة في الشمس.

فخليني اقولك أن الهيئة القومية للتأمين الاجتماعي قالت لكل أصحاب المعاشات والمستحقين إنك تقدر تحول معاشك كله على محفظة تليفونك من وانت في بيتك.

 وكل ده بخطوات بسيطة..  أول حاجة هتعملها إنك تروح لشركة المحمول اللي خطك تابع ليها وتطلب منهم يفتحوا لك محفظة إلكترونية على رقمك وهيدوك ورقة تثبت إن المحفظة اشتغلت وبقت تمام.

وبعد ما تفعل المحفظة هتاخد الورقة دي وتطلع بيها على مكتب التأمينات اللي أنت تابع ليه وتقدم طلب هناك إنك عايز تحول المعاش على المحفظة وتسجل رقم تليفونك في البيانات وبكده أول ما المعاش ينزل هيجيلك علطول على الموبايل وتقدر بعد كده تصرفه براحتك من أي ماكينة صراف آلي بتدعم الخدمة أو من أي منفذ فوري أو كشك قريب منك.

ده غير إنك ممكن تستخدم الفلوس دي علطول من الموبايل وتدفع بيها فواتير الكهرباء والمياه والغاز.