هل شقتك في خطر؟.. الإسكان تحدد آخر موعد قبل سحب الوحدات

لو أنت من الحاصلين على شقة إسكان اجتماعي ولسه ما استلمتهاش، الخبر ده يهمك جدًا.. صندوق الإسكان الاجتماعي أعلن إن يوم 30 يونيو 2026 هو آخر موعد لاستلام الوحدات المخصصة للمستفيدين اللي أنهوا التخصيص لكن ما استلموش شققهم على أرض الواقع.

يعني لو عدى عام كامل على توقيع العقد ولسه ما استلمتش الوحدة أو ما خلصتش إجراءات المعاينة والاستلام، ممكن تتعرض لسحب الشقة وإلغاء التخصيص نهائيًا.

ومش بس كده، الوحدة هتترجع للدولة ويتم طرحها لمواطنين آخرين مستحقين للدعم السكني… كمان في حالات تانية ممكن تؤدي لسحب الشقة، زي تأجيرها أو بيعها قبل انتهاء المدة القانونية، أو تحويلها لنشاط تجاري، أو تقديم بيانات غير صحيحة وقت التقديم، أو التأخر المتكرر في سداد الأقساط.

عشان كده لو شقتك جاهزة للاستلام، الأفضل تراجع جهاز المدينة التابع له المشروع وتستكمل كل الإجراءات قبل انتهاء المهلة.

لو عندك شقة إسكان اجتماعي ولسه ما استلمتهاش.. راجع موقفك بسرعة قبل 30 يونيو، لأن بعد التاريخ ده ممكن تخسر الوحدة بشكل نهائي.