الكيلو وصل 60 جنيه.. أسعار الطماطم ولعـت قبل العيد

إيه اللي حصل للطماطم؟.. الكيلو وصل بـ 60 جنيه.. يعني طبق سلطة دلوقتي بقت مشروع استثماري؟
أسعار الطماطم في مصر ولّعت بشكل مفاجئ قبل العيد وفي مناطق الكيلو وصل لـ 60 جنيه.

وده خلّى ناس كتير تسأل: إحنا داخلين على أزمة جديدة؟، طيب إيه السبب؟
نقيب الفلاحين حسين أبو صدام قال إن المشكلة الأساسية إن المعروض قليل جدًا بسبب ضعف الإنتاج في العروة الحالية… يعني ببساطة الطماطم الموجودة في السوق أقل من الطلب فالسعر طلع للسما.

كمان التغيرات المناخية لعبت دور كبير، ودرجة الحرارة والأجواء الغريبة الفترة الأخيرة أثرت على المحصول،
وده غير بعض الإصابات الحشرية اللي ضربت الزراعة وخفضت الإنتاج أكتر.

نقيب الفلاحين بيقول أن سعر الطماطم في سوق الجملة بيتراوح بين 15 و25 جنيه بس، إنما في بعض المناطق والسلاسل التجارية، السعر وصل لـ 50 و60 جنيه حسب الجودة والنوع.

طب إمتى الأسعار تهدى؟ نقيب الفلاحين قال إن الانفراجة ممكن تبدأ خلال شهر، مع نزول العروة الجديدة وزيادة الإنتاج، وساعتها الأسعار ممكن تنخفض بأكتر من 50%.

وكمان نفى إن التصدير هو السبب، وقال إن مصر صدّرت حوالي 19 ألف طن فقط، وده رقم صغير جدًا مقارنة بإنتاج مصر اللي بيتخطى 6.5 مليون طن سنويًا.