من أكتوبر لـ58 دولة.. الشوكولاتة المصرية تغزو العالم

مصر بقت تجذب مصانع عالمية بشكل ضخم، وآخر المفاجآت كانت من شركة “مارس إيجيبت” الأمريكية، اللي أعلنت قفزة قوية جدًا في صادرات مصنعها بمدينة السادس من أكتوبر.

 المصنع سجل زيادة 259% خلال أول 3 شهور بس من 2026، ووصلت قيمة الصادرات لـ86 مليون دولار، بعد ما كانت حوالي 24 مليون فقط السنة اللي فاتت.

المفاجأة الأكبر أن التوقعات بتقول إن صادرات المصنع ممكن توصل لـ350 مليون دولار بنهاية السنة، وده رقم أكبر من صادرات قطاع الشوكولاتة المصري كامل السنة اللي فاتت.

المصنع دلوقتي بقى ضمن أكبر 5 مصانع لشركة مارس عالميًا، وبيصدر منتجاته لـ58 دولة حول العالم، بنسبة تصدير وصلت لـ93% من الإنتاج.

كمان لأول مرة في الشرق الأوسط وأفريقيا يتم تصنيع منتجات “مارس” و”سنيكرز” و”باونتي” داخل مصر، باستخدام أحدث الروبوتات وتقنيات الذكاء الصناعي.

والأهم إن المصنع وفر أكتر من 20 ألف فرصة عمل مباشرة وغير مباشرة، وده بيأكد إن مصر بقت مركز صناعي وتصديري مهم جدًا للشركات العالمية.