الدولار يعيش أصعب أيامه.. سر انهيار العملة الخضراء في عهد ترامب
يا ترى ايه سر التراجع الكبير للدولار فى اول 100 يوم من ولاية ترامب.. وليه العملة الأمريكية قدمت أسوأ اداء من أكتر من 50 سنة.. وهل حرب الرسوم الجمركية ممكن تنهي هيكمة الدولار على اقتصاد العالم؟ وليه البنوك المركزية فى العالم كله بدأت تفقد الثقة فى العملة الامريكية وتروح للدهب؟
الدولار هو رمز قوة أمريكا الاقتصادية من أيام اتفاقية بريتون وودز سنة 1944.. بس النهاردة.. الدولار بيمر بأزمة حقيقية.. ووفقا لتقرير من بلومبرج فالدولار سجّل أسوأ أداء في أول 100 يوم من رئاسة أمريكية من أيام ريتشارد نيكسون.. يعني من 52 سنة.. تخيّلوا..
مؤشر الدولار هبط لأدنى مستوياته في 3 سنين.. وخسر 1.7% في جلسة واحدة.. وده أكبر هبوط يومي من 2022.. والسبب سياسات ترامب
ترامب.. من ساعة ما رجع البيت الأبيض.. قلب الدنيا.. أول حاجة.. فرض رسوم جمركية كبيرة على كل حاجة.. من الصين لأوروبا وحتى حلفاء أمريكا! الرسوم دي خلّت الأسواق العالمية تهبط هبوط حاد.. ومحت 5.4 تريليون دولار من قيمة الأسهم في يومين بس.
تاني حاجة.. ترامب هاجم رئيس البنك الفيدرالي جيروم باول علنًا.. وطالب بخفض فوايد فوري.. وده خلّى المستثمرين يفقدوا الثقة في استقرار الاقتصاد الأمريكي.. وكمان تغريدة واحدة منه على إكس.. خلّت الدولار يخسر 1% في ساعات.. يعني الراجل بكلمتين بيحرّك الأسواق.
تالت حاجة.. سياسات ترامب اللي بتحاول تقلّص عجز الميزانية والتجارة.. جت بنتيجة عكسية لأنها خلّت الدول التانية زي الصين تبدأ تدوّل اليوان وتربطه بالدهب.. وده بيفتح الباب لنظام مالي جديد من غير الدولار.
و ليه البنوك المركزية بتجري على الدهب؟
البنوك المركزية حوالين العالم.. زي الصين وروسيا ودول البريكس.. بدأت تقلّ اعتمادها على الدولار.. عشان الثقة فيه بتتزعزع.. وفيه تقارير عالمية بتقول إن تلت البنوك المركزية حوالين العالم خططت تزوّد احتياطياتها من الدهب في 2024.. والنهاردة.. نسبة الدهب في الاحتياطيات العالمية وصلت 15.2%.. يعني الدهب بقى الملاذ الآمن الجديد
طب ليه الدهب بالذات؟
لأن الدهب قيمته مستقرة.. مش زي الدولار اللي ممكن ينهار لو السياسات الأمريكية استمرت كده.. كمان البنوك خايفة من عقوبات أمريكية زي تجميد الأصول.. فبقت تشتري دهب بكميات كبيرة.. وده خلّى سعر الدهب يقفز لـ 3500 دولار للأونصة.. زيادة 33% من بداية 2025.
طب هل الدولار هيستمر في الانهيار ولا هيرجع يقوى؟
لو ترامب كمّل على نفس السياسات.. الخبراء بيتوقعوا أزمة ثقة كبيرة في الدولار.. وده ممكن يخلّي الدول تتجه أكتر لعملات تانية زي اليورو أو اليوان.. وكمان الدهب هيفضل نجمه ساطع.. بس في المقابل.. لو أمريكا عدّلت سياساتها.. ممكن الدولار يسترد جزء من قوته.. بس ده هياخد وقت.
الأيام الجاية هتكشف مستقبل العملة الأمريكية رايح على فين وتحركات وقرارات ترامب هي اللى هتجاوب على كل الأسئلة.
