متلخبط ومش فاهم إيه اللي بيحصل في سوق الدهب.. شوف التقرير ده وهتعرف كل الكواليس
هو ايه اللى بيحصل فى سوق الدهب بالظبط ؟ وازاى المعدن النفيس بعد ما وصل لقمة ال 5 الاف جنيه تراجع من جديد ووصل الى 4775 جنية ؟ وهل الأسعار هتفضل تنزل ولا ممكن الصعود يتكرر ؟ وايه علاقة كل ده بالحرب التجارية بين الصين وأمريكا؟
الدهب في مصر كان في موجة صعود رهيبة .. سبع أسابيع ورا بعض والأسعار طالعة زى الصاروخ .. لحد ما جرام الدهب عيار 21 .. اللي هو النجم بتاع السوق عندنا .. وصل لـ 5000 جنيه .. أيوه .. خمسة آلاف جنيه للجرام .. رقم يخليك تقول "ده إيه ده؟" .. بس فجأة .. زي ما طلع بسرعة .. نزل بسرعة .. ورجع لـ 4740 جنيه .. ودلوقتي بيتداول حوالين 4780 جنيه.
طب إيه السبب؟
السبب يا جماعة اسمه "جني الأرباح" .. يعني إيه؟ .. لما الأسعار تطلع زي الصاروخ زي اللي حصل .. الناس اللي اشتروا الدهب زمان بأسعار أقل بيحسوا إن دي فرصتهم .. فيبيعوا عشان يقفلوا الصفقة وياخدوا الربح .. يعني واحد اشترى الدهب بـ 4200 جنيه مثلًا .. ولما وصل 5000 قال "يلا بينا نبيع ونكسب الفرق" .. البيع الكتير ده بيضغط على الأسعار .. فبتبدأ تنزل .. وده اللي حصل الأسبوع اللي فات.
إنت ممكن تقوللي .. طب ده جني أرباح ولا تصحيح سوق؟
سؤال ذكي .. خليني أفرق بينهم .. جني الأرباح زي ما قولنا هو بيع سريع عشان المستثمرين يضمنوا مكاسبهم .. لكن تصحيح السوق حاجة أكبر .. يعني لما الأسعار تكون طلعت أوي من غير سبب قوي .. السوق بيبدأ يرجّع الأسعار لمستوى أكتر منطقية .. زي واحد بيعدل الميزان يعني .. دلوقتي اللي حصل في الدهب أقرب لجني الأرباح .. لأن النزول كان خفيف وسريع .. بس لو الأسعار فضلت تنزل كمان .. يبقى ممكن نبدأ نقول إن السوق بيصحح.
و إيه اللي خلّى الأسعار تتحرك كده؟
فيه كام حاجة مهمة .. أولها ان الدهب عندنا في مصر بيتربط جدًا بأسعار الدهب في العالم .. والأسبوع اللي فات الأونصة العالمية نزلت بنسبة 1.2% عشان المخاوف من الحرب التجارية بين أمريكا والصين هديت .. وكمان الدولار الأمريكي قوى .. فالناس قللوا شرا الدهب كملاذ آمن .. فلما الدهب ينزل في العالم .. أكيد هينزل عندنا.
تاني حاجة .. سعر الدولار في مصر .. الدولار اليومين دول مستقر نوعًا ما قصاد الجنيه .. يعني مفيش هزات كبيرة .. فالأسعار عندنا بقت أكتر ارتباطًا بالسوق العالمي .. لو الدولار انخفض فجأة .. كان ممكن نشوف الأسعار ترجع تطلع تاني.
ونيجي لخبر حلو كده .. صندوق النقد الدولي قال إن الاقتصاد المصري متوقع ينمو بنسبة 3.8% السنة دي .. و4.3% السنة الجاية .. وكمان التضخم هيقل لـ 19.7% السنة دي و12.5% السنة الجاية .. لو الحاجات دي حصلت .. هتبقى دفعة قوية للسوق .. وممكن تخلّي الدهب يستقر أكتر.
الأكيد ان سوق الدهب حاليا مش خاضع لحسابات السوق العادية فيه طفرات بتحصل وفيه هبوط سريه كمان .. فلو ناوي تشتري .. خلّي عينك مفتحة وتابع الأخبار .. ولو إنت مستثمر قديم .. يمكن دي فرصة تجني ربحك .. بس زي ما إنت عارف .. الدهب لسه هو الملاذ الآمِن .. ومحدش يعرف بكرة فيه إيه.
